Ráðhús Reykjavíkur. Eggert Jóhannesson

Hæstiréttur hefur staðfest dóm héraðsdóms sem hafnaði kröfu fyrirtækis um að fá að skila lóð sem því hafði verið úthlutað í Reykjavík. Hæstiréttur hafnaði rökum fyrirtækisins um að forsendur fyrir lóðaúthlutuninni hefðu brostið eftir bankahrunið.

Fyrirtækið Léttkaup ehf.  fékk úthlutað atvinnuhúsalóð við Hádegismóa í Reykjavík í september 2007. Í lok október 2008 óskaði fyrirtækið eftir því að fá að skila lóðinni enda hefðu allar forsendur breyst. Reykjavíkurborg hafnaði erindinu.

Reykjavíkurborg tók á tímabilinu frá júní fram í byrjun október 2008 í sex tilvikum við lóðum undir atvinnuhúsnæði, sem áður hafði verið úthlutað, og endurgreiddi gjöld vegna þeirra. Lögmenn borgarinnar sögðu fyrir dómi að eftirspurn hafi á þeim tíma lengi verið meiri en framboð af slíkum lóðum og hún af þeim sökum mátt ætla að sér tækist að úthluta lóðunum og selja byggingarétt á ný. 

Hæstiréttur taldi að við skil á lóðum hefði verið gætt málefnalegra sjónarmiða. Í dómi Hæstaréttar kom fram að í lóðarúthlutun borgarinnar hafi í senn falist stjórnvaldsákvörðun og gerningur á sviði einkaréttar. Þetta tvöfalda eðli úthlutunarinnar hafi þó takmarkað gildi við úrlausn málsins þar sem Reykjavíkurborg væri einnig bundin af meginreglum stjórnsýsluréttar við ráðstöfun réttinda á sviði einkaréttar.

Hæstiréttur taldi að aðeins kæmi til greina að afturkalla úthlutina að borgin hefði vanefnt skyldur sínar samkvæmt skilmálunum þannig að máli skipti fyrir hagsmuni hans. Ekki hefði verið sýnt fram á þetta.