Bandalag háskólamanna setur það skilyrði fyrir samráði í kjaramálum að horfið verði frá þeirri láglaunastefnu sem boðuð er í fjárlagafrumvarpinu. Þetta segir Guðlaug Kristjánsdóttir, formaður BHM.

Samtök atvinnulífsins hafa óskað eftir að samtök opinberra starfsmanna taki þátt í samráði um gerð nýrra kjarasamninga með samtökum launamanna á almennum markaði.

Guðlaug sagði að ekki væri búið að taka endanlega afstöðu til þessa erindis, en þetta yrði rætt betur á næstunni. Hún sagði hins vegar að miðstjórn BHM hefði í júní samþykkti ályktun um hvaða skilyrði þyrfti að uppfylla ef reynt yrði að framlengja stöðugleikasáttmálann.

„Við getum ekki tekið þátt í einhverri heildarsátt sem byggir á láglaunastefnu. Það eru einnig ófrágengin mál í kjarasamningum okkar frá árinu 2008,“ sagði Guðlaug.

Samningar BHM runnu úr gildi í apríl í fyrra og félögin hafa verið samningslaus síðan. Í ályktun miðstjórnar BHM frá því í sumar segir að BHM krefjist kjaraleiðréttingar til handa félagsmönnum sínum hjá hinu opinbera. „BHM krefst þess að markvisst verði unnið að því að háskólamenntun sé metin til launa og að tafarlaust verði bundinn endi á verðfellingu menntunar á vinnumarkaði.“