Héraðsdómur Reykjaness hefur dæmt 21 árs karlmann í níu mánaða fangelsi, en frestað er fullnustu sjö mánaða haldi hann skilorð. Maðurinn var m.a. sakfelldur fyrir tvær líkamsárásir og var gert að greiða fórnarlömbum sínum rúma milljón í miskabætur og málskostnað.

Auk þess að berja á tveimur mönnum með þeim afleiðingum að annar hlaut eymsli á hálsi og tanngómur féll úr munni hans og brotnaði en hinn heilahristing, nefbrot og mar á höfði, bak við vinstra eyra, hafði maðurinn í hótunum við lögreglumann við skyldustörf.

Samkvæmt ákæruskjali var verið að flytja manninn á lögreglustöð þegar hann lét þau orð falla að hann myndi nauðga konu lögreglumannsins og dóttur. Einnig hafði hann á orði með ógnandi hætti að hann vissi um heimilisfang lögreglumannsins. Þá hrækti maðurinn á hann á lögreglustöðinni og reyndi að sparka og slá til hans. Að vísu taldi dómurinn ósannað að maðurinn hafi reynt að sparka og slá til lögreglumannsins.

Þá var maðurinn sakfelldur fyrir að aka bifreið fjórum sinnum án þess að hafa öðlast ökuréttindi.

Þetta var ekki í fyrsta skipti sem maðurinn gerðist sekur um líkamsárás því í í febrúar 2008 var hann dæmdur í fimm mánaða fangelsi, skilorðsbundið, fyrir sérstaklega alvarlega árás. Með brotum sínum nú rauf hann það skilorð.

Þar sem maðurinn er ungur að árum þótti enn rétt að fresta fullnustu hluta refsingarinnar.