Úr Laugardal.

Tuttugu og þriggja ára karlmaður hefur verið úrskurðaður í gæsluvarðhald til 10. desember að kröfu lögreglunnar á höfuðborgarsvæðinu. Maðurinn, sem var handtekinn í gær, hefur játað að hafa ráðist á 16 ára stúlku á göngustíg í Reykjavík í síðasta mánuði.

Að sögn lögreglunnar  ber maðurinn að öðru leyti við minnisleysi vegna fíkniefnaneyslu.

Árásin var fólskuleg en hún átti sér stað um miðjan dag á göngustíg norðan Suðurlandsbrautar. Maðurinn kom aftan að stúlkunni þar sem hún var á gangi skammt frá Fjölskyldu- og húsdýragarðinum og sló hana í höfuðið með steini. Hann lagði svo á flótta. 

Stúlkan, sem er fædd 1994, komst af  sjálfsdáðum að verslun Heimilistækja við Suðurlandsbraut þaðan sem sjúkralið flutti hana á slysadeild. Hún hlaut höfuðáverka en slasaðist ekki alvarlega.

Gæsluvarðhaldsúrskurðurinn, sem kveðinn var upp á grundvelli almannahagsmuna, hefur verið kærður til Hæstaréttar.