Halldór Halldórsson, formaður Sambands íslenskra sveitarfélaga. Rax / Ragnar Axelsson

Halldór Halldórsson, formaður Sambands íslenskra sveitarfélaga, segir að stjórnvöld ætli með lagabreytingu að þvinga sveitarfélögin til að semja við SFR um starfsmenn sem starfa að málefnum fatlaðra.

Þetta kom fram á fundi sem forystumenn sveitarfélaganna áttu með ráðherrum í ríkisstjórninni í gær. Á fundinum, sem átti að halda í vor, var farið yfir fjárhagsleg samskipti ríkis og sveitarfélaga. Halldór sagði að ekkert hefði komið fram á fundinum sem benti til að ríkisstjórnin ætlaði að hætta við að skerða jöfnunarsjóð sveitarfélaga um einn milljarð eða draga til baka endurgreiðslu á tryggingagjaldi upp á 1,4 milljarða, en sveitarfélögin hafa lýst mikilli óánægju með þessar skerðingar.

Halldór sagði að sveitarfélögin hefðu fært fram fagleg rök fyrir því að það væri óheppilegt að verða við kröfu SFR um að starfsmenn fái að velja sér stéttarfélag eftir flutning málefna fatlaðra til sveitarfélaga.

„Ríkið telur sig vera að fara ákveðna millileið sem felur í sér að þeir sem eru í SFR við flutninginn verði að tilkynna fyrir 15. janúar hvort þeir ætli að vera þar áfram eða fara yfir bæjarstarfsmannafélög. Þeir sem koma nýir inn verða að fara inn í bæjarstarfsmannafélögin,“ sagði Halldór. Hann sagði að þetta væri ekki sú lausn sem sveitarfélögin hefðu verið að kalla eftir. Sveitarfélögin myndu hins vegar fara að lögum.