Endanleg niðurstaða efnagreiningar fíkniefna, sem lögreglan lagði hald á í fimm húsleitum í síðasta mánuði, er væntanleg eftir helgina, að sögn Karls Steinars Valssonar, yfirmanns fíkniefnadeildar LRH. Lagt var hald á amfetamín, kókaín og um tvö kíló af marijúana.

Einnig tók lögreglan reiðufé að andvirði hátt á sjöundu milljón króna og er talið að um afrakstur fíkniefnasölu sé að ræða. Var þar bæði um að ræða íslenskar krónur og evrur. Þá var lagt hald á ýmis önnur verðmæti og hluti sem taldir eru tengjast ætlaðri brotastarfsemi.

Fimm erlendir ríkisborgarar, karlmenn á þrítugs- og fertugsaldri, voru handteknir í tengslum við málið. Fjórir voru handteknir í upphafi og sátu í gæsluvarðhaldi frá 21. október til 11. nóvember og eru í farbanni til 8. desember. Sá fimmti var handtekinn í síðustu viku og úrskurðaður í gæsluvarðhald til 25. nóvember.

Í mati ríkislögreglustjóra á skipulagðri glæpastarfsemi og hættu á hryðjuverkum, sem kom út í mars sl., er m.a. minnst á starfsemi útlendra glæpahópa. Karl Steinar telur að þróun starfsemi erlendra brotahópa hér virðist vera lík og spáð var. Hann sagði erfitt að meta hvort magn fíkniefna í umferð hefði breyst.

„Það virðist vera nokkuð stöðugt framboð af flestum fíkniefnum en kókaín virðist aftur vera að aukast,“ sagði Karl Steinar. Hann sagði að kókaín hefði verið talsvert áberandi í góðærinu en dregið hefði úr því meðan kreppan var sem dýpst. Aukið framboð af því nú gæti verið tákn um að fjárráð fólks séu að aukast.

„Amfetamín er langalgengasta fíkniefnið og marijúana einnig en það er kannski meira í yngri hópunum. Síðan er kókaínið svona hliðarafurð og okkur sýnist það vera heldur á leiðinni til baka,“ sagði Karl Steinar. Efnið er yfirleitt selt í duftformi. Hann segir að reynt sé að smygla kókaíni í ýmsum myndum á milli landa. Venjulega hefur verið reynt að smygla því hingað sem dufti af miklum styrk. Efnið er svo drýgt með íblöndunarefnum áður en það fer á markað. Kókaín hefur einnig borist hingað í fljótandi formi.

Fíkniefni
» Amfetamín og marijúana eru algengustu ólöglegu fíkniefnin hér á landi. Kókaín er aftur að aukast í umferð.
» Amfetamín er búið til við efnafræðilegt ferli. Kókaín er náttúrulegt efni og framleitt úr blöðum kókajurtarinnar.
» Brotahópar í Evrópu hafa meðal annars blandað kókaíni í föt og reynt að smygla því þannig. Einnig hefur því verið blandað í síróp o.fl. til að lauma efninu á milli landa.