Á Holtavörðuheiði. mbl.is/Sigurður Ægisson

Stórhríð er á Holtavörðuheiði og lítið sem ekkert skyggni, að sögn Vegagerðarinnar. Skafrenningur er á Hellisheiði en vegur er þó auður. 
Á Vesturlandi er nú orðið fært bæði á Fróðárheiði og Bröttubrekku en  óveður er í Staðarsveit.

Á Vestfjörðum er ófært bæði  á Klettshálsi og Þröskuldum en fært er um Strandir. Þungfært er í utanverðu Ísafjarðardjúpi.

Á Norðurlandi er víða hvasst og mikil ofankoma. Stórhríð er á Vatnsskarði  en þar er ekki mikið á vegi. Hins vegar er ófært yfir Þverárfjall og milli Sauðárkróks og Hofsóss.

Þungfært er á Öxnadalsheiði. Mikil ofankoma er við Eyjafjörð og mokstur  gengur seint. Þæfingsfærð er utan Dalvíkur. Ófært er um Víkurskarð og eins til Grenivíkur.  Svipað er að segja um Þingeyjasýslur, þar er hríðarveður og víða þæfingsfærð. Stórhríð er á Hólasandi. Ófært er á Hálsum.

Á Austurlandi er hálka eða snjóþekja á flestum leiðum. Á Suðausturlandi er hálka úr Öræfum og vestur fyrir Vík.