Innlent | Morgunblaðið | 15.11.2010 | 5:30

Vilja að allar sjávarafurðir verði unnar á Íslandi

Úr fiskvinnslu HB Granda.

„Það þarf að jafna samkeppnisstöðuna í greininni og núverandi kerfi ýtir undir samkeppnislega mismunun þeirra sem eru annars vegar bæði í útgerð og vinnslu og hins vegar þeirra sem eru einungis í vinnslu.“

Þetta segir Elín Björg Ragnarsdóttir, framkvæmdastjóri Samtaka fiskframleiðenda og útflytjenda (SFÚ), í samtali við Morgunblaðið í dag, en aðalfundur samtakanna fór fram á laugardaginn.

Elín Björg segir að þau fyrirtæki sem einungis starfræki vinnslu sjávarafurða kaupi sitt hráefni á markaðsverði og þurfi fyrir vikið að greiða 30% hærra verð fyrir það en þeir sem einnig séu í útgerð.

„Við höfum bent á að það voru flutt út um 35-37 þúsund tonn óunnin á síðasta fiskveiðiári og það samsvarar um 500 störfum í fiskvinnslu ef hráefnið hefði verið unnið hér á landi. Það er talað um að eitt starf í frumvinnslu skili tveimur öðrum störfum þannig að við gætum verið að tala um þúsund til 1.500 störf,“ segir Elín Björg.