Frá undirritun samkomulagsins í morgun, Jón Gnarr borgarstjóri og Katrín Jakobsdóttir, menntamálaráðherra.

Framkvæmdir við nauðsynlegar úrbætur í aðgengismálum Menntaskólans við Sund hefjast árið 2012 og það sama ár er áætlað að ljúka framkvæmdum sem standa yfir á húsnæði Fjölbrautarskólans við Ármúla. Þetta er meðal þess sem kemur fram í samkomulagi ríkis og Reykjavíkurborgar sem undirritað var í morgun.

Mennta- og menningarmálaðherra, Katrín Jakobsdóttir, og borgarstjóri, Jón Gnarr, skrifuðu í dag undir yfirlýsingu um áframhaldandi samstarf ríkis og borgar í húsnæðismálum framhaldsskóla í Reykjavík til ársins 2014. Samkomulagið tryggir að leyst verður úr húsnæðisvanda þriggja skóla á tímabilinu 2011 til 2014 og verður 1.600 milljónum króna varið til þess verkefnis.

„Kvennaskólinn í Reykjavík hefur lengi verið starfræktur í miðborginni við þröngan húsakost. Til þess að bæta aðstöðu skólans og um leið tryggja starfsemi hans til framtíðar í miðborginni mun gamli Miðbæjarskólinn verða nýttur undir starfsemi hans.

Samkomulag liggur fyrir um kaup ríkisins á 60% hlut í húsnæðinu af Reykjavíkurborg sem áfram mun eiga 40%, í samræmi við ákvæði laga um stofnkostnað opinberra framhaldsskóla. Eftir áramót hefjast framkvæmdir við endurbætur á húsnæðinu og mun það verða tilbúið undir starfsemi Kvennaskólans á nýju skólaári," segir í tilkynningu.

Á næstu misserum verður ráðist í nauðsynlegar framkvæmdir til úrbóta í aðgengismálum. Einnig er gert ráð fyrir viðbyggingu sem að stærstum hluta mun verða kennslurými. Áformað er að undirbúningur og  framkvæmdir geti hafist á árinu 2012.

Við Fjölbrautaskólann við Ármúla hafa staðið yfir framkvæmdir vegna viðbyggingar við húsnæði skólans. Þær framkvæmdir munu halda áfram og er áformað að þeim ljúki samkvæmt áætlun á árinu 2012.

Katrín Jakobsdóttir, mennta- og menningarmálaráðherra, segir í fréttatilkynningu um samkomulagið:
„Það er mjög mikilvægt að samstarfi ríkis og borgar við uppbyggingu framhaldsskóla í borginni sé haldið áfram, en með því er leyst  úr aðkallandi húsnæðisvanda þriggja skóla á næstu árum. Sérstaklega gleðilegt þykir mér að um leið og framtíð Kvennaskólans í miðborginni er tryggð fær hús gamla Miðbæjarskólans aftur sitt upprunalega hluverk – að hýsa skólastarfsemi.“

Jón Gnarr, borgarstjóri segir í fréttatilkynningu um samkomulagið:
„Það er mikil ánægja hjá borginni með að Kvennaskólanum hafi verið tryggð framtíð í gamla Miðbæjarskólanum. Framhaldsskólunum fylgir líf og auðugra mannlíf og gleðiefni að Miðbæjarskólinn sé aftur orðinn að skóla. Ekki síður erum við ánægð með að Menntaskólinn við Sund og Fjölbrautarskólinn við Ármúla sjái nú fram á bætta aðstöðu.“