Lokaæfing kokkalandsliðsins fór fram í Grillinu á Hótel Sögu á mánudaginn var. Ljósmynd/Kokkalandsliðið

Íslenska kokkalandsliðið fer á morgun til Lúxemborgar og tekur þar þátt í heimsmeistaramóti í matreiðslu, Expogast- Culinary World Cup. Liðsmenn eru 15 talsins auk þriggja fylgdarmanna. Liðinu er skipt í „heita“ og „kalda“ liðið.

Heimsmeistarakeppnin fer fram í nokkrum áföngum. Keppt verður í köldu borði sunnudaginn 21. nóvember og í heitum réttum þriðjudaginn 23. nóvember. Í fréttatilkynningu kokkalandsliðsins segir m.a.:

„Kaldaborðið er sýningarborð með mat sem er búið að setja í hlaup svo að hann haldist lengur fallegur og ferskur. Hér er ekki verið að keppa í bragði heldur samsetningu á réttum, útliti og faglegum vinnubrögðum.  Á borðinu eru ýmiskonar réttir, allt frá pinnamat, forréttum, aðalréttum til eftirrétta. Kokkalandsliðið vinnur viðstöðulaust í 30 klst  til að undirbúa þennan  lið svo allt sé sem ferskast þegar dómararnir koma snemma morguns. 
  
Á þriðjudeginum fer fram sá liður keppninnar þar sem keppt verður í þriggja rétta máltíð.  Í þessum lið keppa fimm lönd í einu og hvert land afgreiðir 110 gesti sem velja frá hvaða landi þeir fá matinn og borga fyrir eins og á veitingahúsi.  Í síðustu keppnum hefur alltaf verið uppselt hjá íslenska liðinu og á það einnig við um þessa keppni. Þeir sem sitja svo í dómnefnd eru  þaulreyndir matreiðslumeistarar  sem hafa alþjóðleg dómararéttindi í matreiðslu. 
  
Matseðillinn er ekki af verri endanum og er haft að leiðarljósi að velja íslenskt hráefni: 
  
·         Sykursöltuð bleikja og bleikjutartar á íslensku bankabyggi með blómkáli, pönnusteiktum humri, humarsósu og kryddjurtajógúrti 
·         Lambafillet með sveppum í stökkum hjúp með lambatungu - og skanka, gulrótarfroðu og seljurótarkartöflu ásamt gulrótum og rófum. 
·         Karmellað hvítsúkkulaði með tröllaldin og gulleplum. Borið fram með súkkulaðidufti og kryddjurtasnjó.“ 

Kræsingarnar eru girnilegar og hráefnið íslenskt. Ljósmynd/Kokkalandsliðið