mbl.is/Árni Sæberg

Alls voru 1.266 hegningarlagabrot skráð á landinu í október sl. og eru þau svipað mörg og í október í fyrra. Þá voru fíkniefnabrot 147 talsins í október, en 96 í fyrra. Fjöldi umferðarlagabrota voru tæplega 4.500 nú og eru þau fjórðungi færri en í fyrra, að því er fram kemur nýrri afbrotatölfræði ríkislögreglustjóra.

Eru fíkniefnabrotin 53% fleiri en í fyrra. Segir í skýrslu ríkislögreglustjóra að brotunum hafi fjölgað hlutfallslega mest milli ára í fjórum umdæmum. Þau hafi verið 10 á Selfossi en eitt í fyrra. 21 á Akureyri en 9 í fyrra. 17 á Suðurnesjum en 11 í fyrra og 90 á höfuðborgarsvæðinu, en hafi verið 70 í fyrra.

Skráð voru um 31 hegningarlagabrot að meðaltali á dag í október á höfuðborgarsvæðinu, 3 á dag á Suðurnesjum og 2 á dag á Selfossi og Akureyri. Í öðrum umdæmum var minna en eitt slíkt brot framið daglega að meðaltali.

Flest umferðarlagabrot voru í október 2009 en fæst í október 2005 og 2008. Hraðakstursbrot voru 3.160 sem jafngildir um 102 slíkum brotum á dag. Alls voru 57% umferðarlagabrota skráð á höfuðborgarsvæðinu, 19% á Selfossi og 9% í Borgarnesi. Einnig kemur fram að brot vegna ölvunar við akstur hafi verið færri.

Flest þjófnaðarbrot og innbrot að degi til

Fram kemur að þjófnaðarbrot og innbrot hafi verið færri en í sama mánuði síðustu tvö ár sem sé jákvæð þróun. Bent er á að flestir þjófnaðir eigi sér stað að degi til (39%) og einnig innbrot (30%). Síðarnefndu brotin dreifist hins vegar jafnar en hin þjófnaðarbrotin yfir sólarhringinn.

Í skýrslunni kemur fram að  meira en helmingur líkamsárása eigi sér stað að nóttu til og einnig meirihluti kynferðisbrota, eða 42%.

Eignaspjöll, fíkniefnabrot, áfengislagabrot ,líkamsárásir, akstur gegn rauðu ljósi og nytjastuldur voru hins vegar fleiri í október nú en 2008 og 2009.

Afbrotatölfræði ríkislögreglustjóra.