mbl.is/Friðrik Tryggvason

Ekki var fallist á það í Héraðsdómi Reykjavíkur í dag að starfslokasamningur sem gerður var við starfsmann Glitnis sé forgangskrafa í þrotabú bankans heldur sé um almenna kröfu að ræða. Starfslokasamningurinn var gerður við konu, sem þá var á sextugsaldri, í júníbyrjun 2008. Þar voru hennar tryggðar greiðslur á þriðja ár án vinnuframlags.

Samkvæmt samkomulaginu skyldi konan, sem hóf störf hjá bankanum árið 1970, þá Útvegsbanki Íslands, halda óbreyttum kjörum frá 23. maí 2008 til 31. október 2010 án vinnuskyldu og þann 1. október 2010 skyldi fara fram lokauppgjör milli hennar og bankans.

Þann 2. febrúar 2009 sendi skilanefnd Glitnis konunni lokauppgjör þar sem uppsagnarfrestur hennar samkvæmt ráðningar- og kjarasamningi væri liðinn. Þessu mótmælti konan og sagði að hún hafi starfað um áratugaskeið hjá bankanum og verið hvött til að gera starfslokasamning.  Hún hafi sjálf ekki hugsað sér að láta af störfum á þeim tíma en hafi fallist á það tilboð sem henni hafi verið gert. 

Alls hljóðaði krafa hennar upp á tæpar 8,2 milljónir króna. Er krafa hennar því almenn krafa í þrotabú Glitnis og þarf konan að greiða 250 þúsund krónur í málskostnað.