Þyrla Landhelgisgæslunnar TF-GNÁ leggur upp í eftirlitsflugið frá Kárastaðaflugvelli við Borgarnes í dag. mbl.is/Theodór Kr. Þórðarson

Lagt var hald á fimm haglabyssur og þrjár rjúpur í eftirlitsferð lögreglunnar í Borgarfirði og Dölum á rjúpnveiðislóðir í almenningi á Bröttubrekku og Holtavörðuheiði í dag. Farið var á TF-GNÁ þyrlu Landhelgisgæslunnar og sextán veiðimenn teknir tali, að sögn lögreglunnar. 

Lögreglan óskaði í dag eftir aðstoð þyrlu Landhelgisgæslu Íslands eftir að borist höfðu nokkrar ábendingar um rjúpnaveiðimenn innan umdæmisins sem ekki fylgdu reglum sem eru í gildi um rjúpnaveiðar, að sögn Landhelgisgæslunnar.

Lögreglunni höfðu borist tilkynningar um veiðimenn á fjórhjólum og vélsleðum á veiðislóð, en það er ekki leyfilegt. Mennirnir voru farnir þegar lögreglan kom og sáust engir á fyrrnefndum farartækjum í þessari eftirlitsferð, að sögn Theodórs Kr. Þórðarsonar, yfirlögregluþjóns í Borgarnesi.

Sextán veiðimenn voru teknir tali og athugað með veiðikort þeirra og skotvopnaleyfi. Fimm þeirra voru ekki með sín mál í lagi að því leyti, vantaði annað hvort skotvopnaleyfið eða veiðikortið eða hvort tveggja. Einn mun hafa verið með byssu í eigu annars manns en ekki með skriflega lánsheimild fyrir henni.

Ekki voru allir veiðimennirnir sáttir við þessar aðgerðir lögreglunnar og áttu síst von á því að eftirlitið kæmi að ofan úr heiðskýru lofti!

Lagt var hald á þrjár rjúpur hjá einum veiðimanni sem var ekki með sín mál í lagi. Nánar verður athugað með skráningu skotvopnanna hjá lögreglunni. 

Þyrla Landhelgisgæslunnar var á leið í fjallaæfingu í dag og var því ákveðið að samnýta verkefni landhelgisgæslu og lögreglunnar, að sögn Landhelgisgæslunnar. Lögreglumaður úr Borgarnesi var tekinn um borð í þyrluna áður en farið var til eftirlits um umdæmið.

Þyrlan kom við í Borgarnesi og tók lögreglumann um borð. mbl.is/Theodór Kr. Þórðarson