Geir H. Haarde.

Ekki liggur fyrir hvenær Geir H. Haarde, fyrrverandi forsætisráðherra, fær formlega skipaðan verjanda vegna málshöfðunar fyrir landsdómi. Það getur skipt hann miklu vegna möguleika á gagnaöflun.

Geir telur að óhæfilegur dráttur hafi orðið á þessu og hefur ritað Ingibjörgu Benediktsdóttur, forseta landsdóms, bréf þar sem hann óskar eftir því að Andri Árnason hrl. verði skipaður verjandi sinn og krefst þess að skipunin fari fram tafarlaust.

Þorsteinn A. Jónsson, skrifstofustjóri Hæstaréttar, segir það spurningu um túlkun á 15. grein laga um landsdóm hvenær heimilt sé að skipa Geir verjanda. Í 15. grein segir að forseti landsdóms skipi ákærðum verjanda svo fljótt sem verða megi. Spurningin sé sú hvort líta beri svo á að Geir sé þegar ákærður eftir að Alþingi samþykkti þingsályktunartillöguna um málshöfðun á hendur honum eða hvort hann teljist ákærður við útgáfu ákæruskjals saksóknara, eins og almennt tíðkist í sakamálum. „Erindinu verður svarað fljótlega,“ segir hann.