Lögregla var kölluð í sumarbústað í Reykjaskógi í Árnessýslu aðfaranótt sunnudags vegna karlmanns sem réðist þar á konu.  Rétt áður en lögreglumenn komu á staðinn var aðstoðin afturkölluð þar sem karlmaðurinn var farinn úr bústaðnum.  Áverkar konunnar voru minni háttar.  Ekki liggur fyrir hvort hún mun leggja fram formlega kæru, samkvæmt upplýsingum frá lögreglu. 

Um kl. 06:00 á laugardagsmorgun bárust innbrotsboð frá sumarbústað í landi Heiðarbæjar  við Þingvallavatn.  Lögreglumenn fóru þegar á staðinn en urðu ekki varir við mannaferðir.  Staðfest var að brotist hefði verið inn í bústaðinn með því að spenna upp glugga með kúbeini.  Eigendur bústaðarins söknuðu flatskjás.  Er leið á morguninn var tilkynnt um innbrot í bústað í Svínahlíð sem er skammt frá.  Þar var sömu aðferð beitt við að komast inn í húsið og þjófarnir skildu eftir kúbein.  Úr bústaðnum var stolið flatskjá og hljómtækjum og öðrum rafmagnstækjum. 

Brotist var inn í tvo sumarbústaði sem standa við Hásteinsveg á Stokkseyri nú um helgina.  Ekki liggur hvort einhverju var stolið í þessum innbrotum þar sem eigendur eiga eftir að fara yfir það. 

Brotist var inn í veitingastaðinn Kjöt og Kúnst við Breiðumörk í Hveragerði aðfaranótt laugardags.  Á milli kl. kl. 03 og 04 sást til dökkblárrar Toyota Corolla bifreiðar, gæti verið árgerð 1997 -8, lagt við veitingastaðinn.  Tveir menn sáust fara út úr bifreiðinni og ganga að veitingastaðnum.  Bifreiðinni var svo ekið í burtu en kom skömmu síðar og mennirnir tveir settust inn í hana. 

Í ljós kom að af veitingastaðnum var stolið nokkrum áfengisflöskum og bjór.  Lögreglan biður þá sem geta gefið upplýsingar um málið eða þekkir til lýsingar á ökutækinu að hafa samband í síma 480 1010.