Tryggvi Þór Herbertsson.

Tryggvi Þór Herbertsson, þingmaður Sjálfstæðisflokksins í Norðausturkjördæmi, sagðist á Alþingi í dag vísa því á bug að hafa verið í einhverju „hankí-pankí" með fjármálaráðherra varðandi bætur til stjórnenda meðferðarheimilisins Árbótar í Aðaldal.

Tryggvi Þór vísaði í frétt Fréttablaðsins í dag þar sem fjallað er um tölvupóst frá Árna Páli Árnasyni, þáverandi félagsmálaráðherra, til nokkurra embættismanna 7. maí. Í póstinum segir: „Hef áhyggjur af því að klára málið með öllum þessum útgjöldum fyrir [Barnaverndarstofu] í andstöðu við forstjóra stofnunarinnar. Af hverju erum við að borga meira en 30 milljónir umfram skyldu? Hvers vegna? Jú - vegna sanngirnissjónarmiða og þrýstings frá kjördæmisþingmönnum."  

„Ég frábið mér sem þingmaður Norðausturkjördæmi að vera  sakaður um eitthvað hankí-pankí með fjármálaráðherra, jafnvel þótt heimildarmaðurinn sé Árni Páll Árnason," sagði Tryggvi Þór. 

Sigurður Ingi Jóhannsson, þingmaður Framsóknarflokksins, sagði að þingmenn flokksins í Norðausturkjördæmi hefðu ekki komið nálægt Árbótarmálinu svonefnda, þar hefði verið um að ræða þingmenn sem standa nær fjármálaráðherra. 

Kristján L. Möller, þingmaður Samfylkingarinnar í Norðausturkjördæmis, sagði að fréttir um samkomulagið við forsvarsmenn Árbótar í gær hefðu komið honum og öðrum þingmönnum Samfylkingarinnar í kjördæminu jafn mikið á óvart og öðrum. Mál Árbótar hefði einu sinni verið rætt á fundi allra þingmanna kjördæmisins en þar hefði aðeins verið lýst áhyggjum af því, að loka ætti meðferðarheimilinu.