Frá Alþingi.

Þingmenn ræddu á Alþingi í dag um mál 15 ára  fatlaðs drengs, sem fjallað var um í fréttum Stöðvar 2 í gærkvöldi. Þar kom fram, að drengurinn, sem er blindur og heyrnarlaus og bundinn við hjólastól, verður sennilega að flytja af heimili sínu á Akureyri vegna þess að Tryggingastofnun og Akureyrarbær hafa hafnað málaleitan foreldra hans um styrki svo hægt sé að breyta húsnæði þeirra.

Sigmundur Ernir Rúnarsson, þingmaður Samfylkingarinnar, vakti athygli á málinu í umræðum um störf þingsins og sagði, að gríðarlegt álag væri fyrir fjölskyldur að annast fjölfötluð börn. Þau byggju mörg við annars flokks mannréttindi og yrðu að flytja að heiman langt fyrir aldur fram.

„Þessi drengur er aðeins að biðja um að fá að búa áfram á sínu heimili eins og öll önnur börn vilja gera," sagði Sigmundur Ernir. Spurði hann hvort félags- og trygginganefnd þingsins myndi taka þetta mál upp.

Sigríður Ingibjörg Ingadóttir, starfandi formaður nefndarinnar, sagði að Tryggingastofnun greiddi framfærslueyri eða bætti upp fyrir kostnað vegna fötlunar eða sjúkdóms. Stofnunin hefði hins vegar ekkert með húsnæði að gera. 

Það væri hins vegar alvarlegt vandamál, að í tryggingakerfinu  væri ekki  almennilega gert ráð fyrir breytingum, sem gera þyrfti á húsnæði vegna fatlaðra. Ekki sé gert ráð fyrir því í útgjöldum ríkisins til húsnæðismála, að standa straum af kostnaði sem þessum.

Fólki, eins og fjölskyldu viðkomandi drengs, byðust lán á markaðskjörum til að breyta húsnæði sínu en ekki sérstakir styrkir. „Þetta er náttúrulega ekki í anda jafnaðarstefnunnar og ekki í anda hins góða samfélags," sagði Sigríður Ingibjörg. Finna yrði leiðir til að niðurgreiða vexti og bjóða upp á styrki til að koma til móts við þessa einstaklinga.