Arionbanki yfirtók Sparisjóð Mýrasýslu í Borgarnesi. hag / Haraldur Guðjónsson

Héraðsdómur Vesturlands dæmdi Arionbanka í vil í gengislánadómi í dag, sem höfðað var gegn Birni Þorra Viktorssyni og Karli Georg Sigurbjörnssyni vegna láns sem tekið var hjá Sparisjóði Mýrarsýslu árið 2005. RÚV greindi frá þessu.

Lánið var í svissneskum frönkum en veitt í íslenskum krónum, í upphafi að jafnvirði 17,6 milljóna króna. Lánið var ekki greitt en á gjalddaga í nóvember 2008 var lántakanda send greiðslukvittun. Samkvæmt dómnum var kvittunin send fyrir mistök. Arionbanki, sem yfirtók Sparisjóð Mýrasýslu, hélt því fram að lánið væri ógreitt þrátt fyrir að sjálfvirk greiðslukvittun hafi verið send út fyrir mistök. Lántakandi krafðist sýknu og til vara að lánið hafi verið veitt í íslenskum krónum, enda hafi það verið raunin.

Samkvæmt frétt RÚV féllst dómurinn ekki á að greiðslukvittunin hafi verið gild, þar sem ljóst var að um mistök hafi verið að ræða. Taldi dómurinn ennfremur að lánið hafi verið veitt í erlendri mynt. Ekki var fallist á að almenn þróun efnahagsmála hafi verið virt sem brostin forsenda, sem haft gæti áhrif á lánið. Gengistrygging lánsins var því staðfest í Héraðsdómi Vesturlands, en kröfu bankans um dráttarvexti var hins vegar vísað frá, að því er kom fram í kvöldfréttum RÚV.