Jón Gnarr afhendir Helgu Jónsdóttur í Gullkúnst Helgu Njarðarskjöldinn í kvöld. mbl.is/Golli

Gullkúnst Helgu, við Laugaveginn, fékk í kvöld Njarðarskjöldinn, hvatningarverðlaun ferðamannaverslana í Reykjavík, sem Reykjavíkurborg og samstarfsaðilar standa að árlega.

Verðlaunin voru afhent af Jóni Gnarr borgarstjóra á opnum íbúafundi í Ráðhúsinu í kvöld. Þykir Gullkúnst Helgu hafa skarað fram á árinu meðal ferðamannaverslana í miðbænum.

Að Njarðarskildinum standa Reykjavíkurborg, Miðborgin okkar, Global Blue, Iceland Refund, Félag atvinnurekenda og Kaupmannasamtökin.

Njörður, sem skjöldurinn er kenndur við, var upphaflega frjósemisguð en síðar guð sæfarenda og sagður fésæll mjög. Sæfarendur þess tíma stunduðu gjarnan kaupskap og hefur þótt við hæfi að kenna árleg hvatningarverðlaun til ferðamannaverslunar við guð siglinga og viðskipta.

Við tilnefningu ferðamannaverslunar ársins er leitast við að verðlauna þá verslun sem hefur náð hvað bestum söluárangri til erlendra ferðamanna milli ára. Horft er til markaðs- og kynningarmála, svo sem auglýsinga, vefs og útlits almennt. Aðrir þættir eru einnig metnir sérstaklega svo sem þjónustulund, opnunartími, merkingar um endurgreiðslu virðisauka auk útlits og lýsingar verslunarinnar. Einnig er framkoma og tungumálakunnáttu starfsfólks metin og þekking þeirra á söluvörunum.

Nýta hraun og steina

 Verðlaunahafinn í ár, verslunin Gullkúnst Helgu, sérhæfir sig í sölu á íslensku skarti. Það sem einkum stendur upp úr við valið að þessu sinni er öflug sala til erlendra ferðamanna en einnig einkar glæsileg verslun og fjölbreytt úrval íslenskrar skartgripahönnunar, segir í tilkynningu frá aðstandendum verðlaunanna.

Helga Jónsdóttir, Sveinn Guðnason og aðrir gullsmiðir í versluninni hafa nýtt hraun og íslenska steina í miklum mæli og þannig lagt grunninn að miklum vinsældum þess konar skarts meðal erlendra ferðamanna og eru með þessa séríslensku nálgun sína í stöðugri mótun og þróun.

Uppbygging verslunarinnar, sem er stærsta skartgripaverslun landsins, minnir um margt á listmunasýningu en gestir hennar geta virt fyrir sér fjölbreytta skartgripaflóru í þartilgerðum upplýstum sýningarkössum úr tekki og gleri, segir í tilkynningunni.

Helga setti fyrstu verslunina á fót á Laugavegi 40 en flutti sig síðar yfir á 45 en opnaði í núverandi húsnæði á Laugavegi 13, þar sem verslunin Habitat stóð áður, árið 1996. Hún hefur því frá byrjun haldið sig við þessa helstu verslunargötu Reykjavíkur. Hún segir erlenda ferðamenn mikilvægan viðskiptahóp, sérstaklega fyrir sumartímann.

„Helga segir að erlenda ferðamenn oft tjá sér undrun sína með fjölda gullsmiða, hönnuða og fallegs handverks í miðborg Reykjavík og að gæði varanna komi þeim oft á óvart. Ekki spillir að veikari króna eykur kaupmátt þeirra og endurgreiðsla virðisaukans er skilvirk og einföld í borginni," segir í tilkynningu Njarðarskjöldinn í ár.