Ólafur Ragnar Grímsson. mbl.is/Árni Sæberg

Ólafur Ragnar Grímsson, forseti Íslands, segir kosti þess að taka upp evru á Íslandi ekki jafn skýra og fyrir ári. Hvert evruríkið á fætur öðru eigi í vanda, síðast Írland. Forsetinn ræddi stöðu evrunnar og hvernig gengislækkun krónunnar hefur hraðað efnahagsbata Íslands í samtali við Reuters.

Forsetinn sagði blaðamanni Reuters að fyrir rúmu ári hafi umræðan um rökin fyrir Evrópusambandsaðild á Íslandi einkum snúist um að fjármálamarkaðir hefðu þróast með þeim hætti að erfitt væri fyrir litla þjóð að halda úti sjálfstæðum gjaldmiðli.

„En síðan höfum við séð hvert evruríkið á eftir öðru lenda í miklum vandræðum. Nú síðast það sem hefur gerst á Írlandi. Svo kostir þess að hafa annan gjaldmiðil eru orðnir óskýrari,“ sagði forsetinn í lauslegri þýðingu.

Evran engin uppskrift að árangri

Ætla má að ummælin veki athygli enda hefur talsvert verið fjallað um dræman stuðning við aðildarumsókn Íslands að Evrópusambandinu á meðal Íslendinga í heimspressunni að undanförnu.

„Evran er ekki skotheld formúla fyrir efnahagsuppgangi eins og Grikkland og Írland og önnur ríki upplifa nú,“ sagði forsetinn sem þakkaði gengislækkun krónunnar þann árangur sem náðst hefði í íslensku efnahagslífi frá hruni.

„Viðsnúningurinn í hagkerfinu hefur orðið fyrr og með öflugri hætti en búist var við fyrir tveimur árum vegna þess að útflutningsgeirinn, sjávarútvegur, landbúnaður og ferðaþjónusta hafa sterkara samkeppnisforskot.“

Aðild að Evrópusambandinu ekki úrslitaatriði

Forsetinn vék einnig að litlum stuðningi við ESB-aðild á Íslandi.

„Skoðanakannanir á síðustu mánuðum hafa sýnt greinilega fram á að andstaðan við Evrópusambandsaðild hefur farið vaxandi. Fólk telur ekki að [ESB-aðild] sé úrlistaatriði. Hvort hún gæti haft ávinning í för með sér er annað mál.“ 

Þá sagði forsetinn að niðurstaðan í samningaviðræðum Íslands og ESB í sjávarútvegsmálum myndi ráða úrslitum um afstöðuna til aðildar á Íslandi.