Frá dvalar- og hjúkrunarheimilinu Grund. Myndin tengist efni fréttarinnar ekki beint. mbl.is/Jakob Fannar

Á þessu og næsta ári er reiknað með hjúkrunarrýmum fyrir aldraða fækki um 136 og dvalarrýmum um 130. Miðað við fækkun rýma árið 2011, eða 81 hjúkrunarrými og 47 dvalarrými, er búist við að störfum fækki um 45 til 70, samkvæmt skriflegu svari heilbrigðisráðherra við fyrirspurn Guðlaugs Þórs Þórðarsonar þingmanns.

Samkvæmt svari ráðherra var hjúkrunarrýmum á hjúkrunarheimilum fækkað um 22 í upphafi þessa árs og dvalarrýmum á heilbrigðisstofnunum fækkað um 33. Við ákvörðun um fækkun rýma var stuðst við upplýsingar um fjölda einstaklinga með vistunarmat og fjölda vannýttra rýma á liðnum árum. Í fjárlagafrumvarpinu 2011 er gert ráð fyrir að fækka um 47 hjúkrunarrými á hjúkrunarheimilum og um 34 vannýtt hjúkrunarrými á heilbrigðisstofnunum, eða alls 81 rými.

Dvalarrýmum var fækkað um 83 í ársbyrjun og í fjárlagafrumvarpinu er reiknað með að fækka um 47 dvalarrými, sem fyrr segir. Guðlaugur Þór spurði jafnframt hversu mörg rúm í einbýlum myndu standa auð eftir fækkunina. Í svarinu segir að leitast verði við að breyta tvíbýlum í einbýli þar sem mögulegt er. Það leiði ekki til þess að einbýli standi auð.

Uppsagnir að óbreyttu

Varðandi uppsagnir starfsmanna segir ráðherra að fækkun rýma hafi hingað til fyrst og fremst verið vegna vannýttra rýma og bendi upplýsingar frá stofnunum til þess að hagræðingarkröfu hafi að mestu leyti verið mætt án uppsagna. Hins vegar sé ljóst að samkvæmt fjárlagafrumvarpinu muni fyrirhuguð fækkun rýma á næsta ári að óbreyttu leiða til uppsagna. Miðað við fækkun á 81 hjúkrunarrými og 47 dvalarrýmum á næsta ári megi búast við að störfum fækki um 45 til 70.