Fjármálaráðuneytið. mbl.is

Meirihluti fjárlaganefndar hefur sent frá sér nefndarálit um frumvarp til fjáraukalaga fyrir árið 2010. Lagðar eru til tillögur sem lækka útgjöld ríkisins um 5,4 milljarða en meirihlutinn gerir jafnframt tillögur um 6,9 milljarða í auknar tekjur á rekstrargrunni.

Nefndin hefur haft frumvarpið til athugunar og í því skyni leitað skýringa hjá fjármálaráðuneyti og fagráðuneytum varðandi beiðnir um auknar fjárheimildir. Segist meirihlutinn einnig hafa farið yfir þau erindi sem hafa borist nefndinni. Mun nefndin á milli 2. og 3. umræðu um frumvarpið kalla eftir frekari upplýsingum um einstaka málaflokka.

Í áliti meirihlutans segir m.a.: „Ríkissjóður varð fyrir gífurlegu tjóni í kjölfar falls bankanna haustið 2008. Þyngstu höggin á ríkissjóð af þessum sökum voru fall Seðlabanka Íslands upp á 170 milljarða kr., endurfjármögnun bankanna upp á 200 milljarða kr., skuldasöfnun vegna hallareksturs upp á 225 milljarða kr. auk lána til að byggja upp gjaldeyrisvarasjóð upp á 120 milljarða kr. Þessu til viðbótar varð ríkissjóður fyrir miklum tekjubresti auk þess sem vaxtakostnaður margfaldaðist vegna aukinna skulda. Því var ljóst að bregðast þurfti við þessum mikla vanda með afgerandi hætti, með aukinni tekjuöflun, samdrætti í útgjöldum og ekki síst með auknu aðhaldi í ríkisfjármálum. Segja má að aðhald og eftirfylgni með fjármálum ríkisins hafi verið í miklum lamasessi til margra ára. Þó svo að tekjur ríkissjóðs hafi jafnan verið meiri en áætlanir og fjárlög hvers árs gerðu ráð fyrir voru útgjöldin sömuleiðis langt umfram settan ramma á ári hverju.“

Æðsta stjórn ríkisins fái 43 milljónir

Meðal tillagna meirihlutans er að lagt til er að fjárheimild æðstu stjórnar ríkisins verði aukin um 43 milljónir króna, þar af 4,4 milljónir vegna rannsóknarnefndar Alþingis, 12 milljónir vegna kaupa á sérfræðiþjónustu vegna stjórnlagaþings og 11 milljónir vegna starfa saksóknara Alþingis og málareksturs fyrir landsdómi.

Lagt er til að fjárheimild menntamálaráðuneytisins hækki um 24 milljónir en heimild utanríkisráðuneytisins lækki um 12 milljónir. Heimild dóms- og mannréttindaráðuneytisins verði einnig lækkuð, eða um 35 milljónir, en sjávarútvegs- og landbúnaðarráðuneytið fái heimildir auknar um 19 milljónir króna.

Þá leggur meirihlutinn til að heimildir félags- og tryggingamálaráðuneytisins verði lækkaðar um 2,8 milljarða, þar af um 1,2 milljarða vegna minni atvinnuleysisbóta. Ekki gerir meirihluti fjárlaganefndar miklar breytingar á framlögum til heilbrigðisráðuneytisins á þessu ári, eða viðbót um 1 milljón króna til Forvarnasjóðs.

Fjármálaráðuneytið á að fá sín auknar heimildir upp á 1,1 milljarð króna. Munar þar mestu um auknar ríkisábyrgðir, um 1 milljarð, vegna afborgana og vaxta af lánum sem voru með ábyrgð í lánasöfnum föllnu bankanna þriggja. Meðal annarra tillagna er snúa að fjármálaráðuneytinu er að 250 milljónir króna verði vettar til Þróunarfélags Keflavíkurflugvallar.

Ranghermt var í fyrirsögn með þessari frétt á mbl.is fyrr í kvöld að útgjöld yrðu aukin um 5,4 milljarða og er beðist velvirðingar á því.