Álver á Bakka enn inni í myndinni
Frá Alcoa Fjarðaáli. Bergur telur enn líkur á að álver rísi á Bakka. Þorvaldur Örn Kristmundsson
„Við erum afskaplega glöð með að þessu sé loksins lokið og nú er kominn tími til þess að gera eitthvað í málum. Við munum bíða og aðstoða þá aðila sem vilja byggja upp eftir fremsta megni,“ segir Bergur Elías Ágústsson, sveitarstjóri Norðurþings, um niðurstöðu Skipulagsstofnunar. Álver sé enn í myndinni.
Eins og komið hefur fram hefur Skipulagsstofnun sent frá sér niðurstöðu vegna mats á umhverfisáhrifum en stofnunin telur að heildaráhrif Kröfluvirkjunar II, Þeistareykjavirkjunar, álvers á Bakka við Húsavík og háspennulína frá Kröflu og Þeistareykjum að álveri á Bakka muni óhjákvæmilega hafa í för með sér umtalsverð umhverfisáhrif í skilningi laga um mat á umhverfisáhrifum.
Bergur Elías telur enn líkur á að álver rísi á Bakka við Húsavík.
„Við erum afskaplega ánægð með að þessu mati skuli vera lokið eftir tvö ár og fjóra mánuði og almennt má segja um niðurstöðuna í álitinu að það er ekkert sem kemur á óvart að einu eða neinu leyti. Þetta er allt þekkt og þegar menn skoða hin einstöku álit eru þarna ábendingar sem verður að sjálfsögðu reynt að koma til móts við.“
Haldi áfram að bora
- Hvernig sérðu framkvæmdaáætlunina fyrir þér?
„Ég hefði vonað að nú fljótlega liggi fyrir einhver ákvörðun um að halda áfram að bora því að nú fá menn heimild til þess, þ.e. til þess að afla meiri orku á háhitasvæðinu. Fyrsta verkefnið sem þarf að vinna er að halda rannsóknum og borunum áfram á næsta ári. Það mun í sjálfu sér skapa störf og vonandi kemur hitt í framhaldinu,“ segir Bergur Elías og útskýrir hvernig boranir við Þeistareyki hafi verið settar á ís á meðan á vinnu Skipulagsstofnunar stóð.
- Hvernig bregstu við þeim ummælum Árna Finnssonar, formanns Náttúruverndarsamtaka Íslands, að með þessari niðurstöðu sé álver á Bakka út af borðinu?
„Ég veit ekki hvað Árni Finnsson á við. Það er ekkert sem bendir til að svo sé. Ef hann heldur því fram held ég að hann ætti að kynna sér þau gögn sem þarna liggja fyrir mun betur.“
Ekkert nýtt í niðurstöðunni
- Þannig að þú telur að það geti engu að síður orðið af álveri á Bakka?
„Já. Það er ekkert nýtt þarna. Ekki neitt.“
- Telurðu að álverið geti orðið 360.000 tonn?
„Það er alveg ljóst og hefur alltaf legið fyrir frá upphafi að þegar farið var í matið var þar gert ráð fyrir allt að 346.000 tonnum. Það hefur einnig legið ljóst fyrir að ef menn færu í svo stóra framkvæmd þyrfti hún að gerast yfir töluvert langan tíma og hefur í raun og veru þær takmarkanir að ekki er hægt að svara þessari spurningu fyrr en að einhverjum árum liðnum. Þannig að menn munu fara mjög, mjög varlega. Það þýðir ekki að menn geti ekki byggt minna og hugsanlega þá stækkað síðar sé orka fyrir hendi.“
- Hvernig ætlar sveitarfélagið að bregðast við?
„Við bregðumst við með þeim hætti að við fögnum því að þessum áfanga sé náð. Það sem er í raun og veru eftir er að sveitarfélögin í Þingeyjarsýslu þurfa að veita framkvæmdaleyfi og Umhverfisstofnun starfsleyfi og að sjálfsögðu þarf að semja við orkukaupandann um nýtingu orkunnar. Það er eitt í þessu sem er mikilvægt að halda til haga en það er að við svona stórar framkvæmdir verður alltaf ákveðið rask. Það gera sér allir grein fyrir því. Við höfum haft það að leiðarljósi að reyna að takmarka umhverfisáhrif eins mikið og kostur er. Þegar öllu er á botninn hvolft er staðreyndin sú að nú þurfum við að fara að skapa störf.“
Bergur Elías Ágústsson, sveitarstjóri í Norðurþingi mbl.is
