Ögmundur Jónasson, dómsmála- og mannréttindaráðherra, Jóhanna Sigurðardóttir, forsætisráðherra og Stefán Eiríksson lögreglustjóri mbl.is/Golli

Gengið var gegn kynbundnu ofbeldi í Reykjavík í kvöld. Hófst gangan við Þjóðmenningarhúsið við Hverfisgötu og er gengið að Sólfarinu við Sæbraut. Sex ráðherrar taka þátt í ljósagöngunni í ár en hún markar upphaf sextán daga átak gegn ofbeldi gegn konum.

Er það UNIFEM á Íslandi (nú hluti af Jafnréttisstofnun Sþ – UN Women), í samvinnu við mannréttindasamtök og kvennahreyfinguna á Íslandi, sem standa fyrir ljósagöngunni í tilefni af alþjóðlegum degi gegn kynbundnu ofbeldi.

Kyndilberar í ár verða Jóhanna Sigurðardóttir, forsætisráðherra, Steingrímur J. Sigfússon, fjármálaráðherra, Ögmundur Jónasson, dómsmála- og mannréttindaráðherra, Svandís Svavarsdóttir, umhverfisráðherra, Katrín Jakobsdóttir, mennta- og menningarmálaráðherra, Katrín Júlíusdóttir, iðnaðarráðherra ásamt Stefáni Eiríkssyni, lögreglustjóra höfuðborgarsvæðisins og fleirum.

Alþjóðlega yfirskrift átaksins í ár er: Berjumst gegn ofbeldi gegn konum á átakasvæðum og viljum við á Íslandi leggja áherslu á ábyrgð gerenda í ofbeldismálum, segir í tilkynningu frá aðstandendum átaksins.

„Með ljósagöngunni er tilgangurinn að vekja athygli á stöðu þeirra milljóna kvenna sem verða fyrir ofbeldi, bæði hér heima og erlendis. Markmiðið er einnig að minna á þá skömm og niðurlægingu sem slíku ofbeldi fylgir þegar ábyrgðin ætti að öllu leyti að hvíla á herðum gerandans.

Slökkt verður á friðarsúlunni þennan dag klukkan 19.45 til að vekja athygli á því myrkri og einangrun sem fórnarlömb kynbundins ofbeldis þurfa að búa við. Með því að tendra ljósið á ný fylgir sú von að hægt verði að vinna bug á ofbeldi gegn konum í heiminum og því kynjamisrétti sem því fylgir. Friður ríkir ekki fyrr en búið er að uppræta ofbeldi gegn konum, í öllum þeim myndum sem það birtist," segir í tilkynningu.

Steingrímur J. Sigfússon, fjármálaráðherra ásamt fleiri göngumönnum í kvöld mbl.is/Golli