VBS.

Hæstiréttur hefur dæmt að breski kaupsýslumaðurinn Kevin Stanford og fjárfestingarsjóðurinn Kcaj LLP þurfi að greiða VBS fjárfestingarbanka 5 milljóna punda skuld jafnvirði 906 milljóna króna. Um er að ræða lán, sem enska félagið Ghost Ltd tók árið 2007 en Stanford og Kcaj gengust í ábyrgð fyrir.

Héraðsdómur Reykjavíkur hafði áður sýknað Stanford og Kcaj af kröfu bankans.

VBS taldi að Stanford og Kcaj hefðu undirgengist sjálfskuldarábyrgð á láninu til  Ghost, sem síðan varð gjaldþrota. En þegar VBS krafði Stanford og Kcaj um greiðslu lánsins neituðu þeir.

Héraðsdómur komst að þeirri niðurstöðu að Stanford og fulltrúar Kcaj hefðu með undirritun sinni á lánsskjölin samþykkt skilmála lánsins en ekki að tekist á hendur sjálfskuldarábyrgð. 

Þessu er Hæstiréttur ekki sammála og segir, að þegar litið sé til aðdragandans að gerð lánssamningsins og ótvíræðs orðalags hans yrði að telja að Kevin Stanford og Kcaj hefðu undirgengist sjálfskuldarábyrgð á skilvísum greiðslum lánsins.

Þá segir meðal annars í dómi Hæstaréttar að þótt lántaki hefði einnig sett greiðslur nytjaleyfisgjalda sem tryggingu fyrir skilvísum greiðslum lánssamningsins hefði það ekki áhrif á greiðsluskyldu Stanfords og Kcaj, sem sjálfskuldarábyrgðaraðila, gagnvart VBS, sem kröfuhafa, nema um það hefði sérstaklega verið samið, en slíkan fyrirvara væri ekki að finna í lánssamningnum. Var krafa VBS á hendur Kevins Stanford og Kcaj því tekin til greina.