Alþingishúsið við Austurvöll Ómar Óskarsson

Ljós verða kveikt á Oslóar-jólatrénu á Austurvelli í dag og hefst athöfnin kl. 15:30. Tæp sextíu ár eru síðan Norðmenn færðu Íslendingum í fyrsta sinn grenitré að gjöf til að skreyta Reykjavík. Tréð í ár var höggvið við hátíðlega athöfn í Aurtjørn í Nordmarka að viðstöddum sendiherra Íslands og borgarstjóra Oslóar.

Lúðrasveit Reykjavíkur hefur dagskrána kl. 15:30 með því að leika falleg jólalög undir stjórn Lárusar H. Grímssonar. Kl. 16:00 tekur Dómkórinn við og syngur nokkur lög undir stjórn Kára Þormar. Því næst mun Dag Wernø Holter sendiherra Noregs á Íslandi og Aud Kvalbein varaborgarstjóri Oslóarborgar afhenda Reykvíkingum tréð að gjöf. Jón Gnarr borgarstjóri tekur við trénu og hin 11 ára norsk-íslenska Embla Gabríela Børgesdóttir Wigum fær þann heiður að tendra ljósin á trénu góða.

Reykjavíkurborg hefur frá upphafi stutt jólaóróaverkefni Styrktarfélags lamaðra og fatlaðra, en óróarnir prýða Óslóartréð og eru eina skrautið á trénu auk jólaljósanna. Í ár er viðfangsefnið Jólakötturinn.Hildigunnur Gunnarsdóttir og Snæfríð Þorsteins, hönnuðir og skáldið Þórarinn Eldjárn leggja Styrktarfélagi lamaðra og fatlaðra lið með túlkun sinni á Jólakettinum - þær stöllur fást við stálið en Þórarinn við málið. Þórarinn frumflytur kvæðið um Jólaköttinn á Aðventuhátíðinni. Allur ágóði af sölu Jólakattarins rennur til starfs í þágu fatlaðra barna og ungmenna.

Þegar ljósin hafa verið kveikt á jólatrénu og Austurvöllur er kominn í jólabúning birtast góðir gestir á sviðinu. Forsetinn og prinsessan úr söngleiknum Ballið á Bessastöðum koma og syngja titillag söngleiksins en það er nú þegar orðið mörgum krökkum kunnugt.

Jólasveinarnir Gluggagægir, Stúfur og Giljagaur hafa stolist til byggða og láta sjá sig á Austurvelli. Þeir ætla að kenna stórum sem smáum hvernig best er að halda á sér hita og svo þykir þeim auðvitað ekkert eins skemmtilegt og að syngja jólalög með kátum krökkum!