Auður Finnbogadóttir.

Auður Finnbogadóttir hefur verið ráðin framkvæmdastjóra Lífeyrissjóðs verkfræðinga  og hefur hún störf þann 1. desember.

Auður er viðskiptafræðingur frá University of Colorado at Boulder í Bandaríkjunum og með MBA próf frá Háskólanum í Reykjavík. Hún er löggiltur verðbréfamiðlari og stóðst hæfispróf sem framkvæmdastjóri lífeyrissjóðs undir lok síðasta árs.

Auður hefur um 15 ára starfsreynslu á fjármálamarkaði, þ.á.m. reynslu af eignastýringu.  Hún var framkvæmdastjóri MP Banka hf. frá stofnun til ársins 2003.  Á árunum  2003-2009 starfaði hún sjálfstætt við ráðgjöf tengda fjármálum og eignastýringu og rak eigið fjármálafyrirtæki, A Verðbréf hf., á árunum 2006-2008.   Auður var í stjórn Landsnets hf.  frá  2003-2009, í stjórn Nýja Kaupþings banka hf.  frá nóvember 2008-ágúst 2009, í stjórn RÚV ohf.  frá janúar 2008-janúar 2009, og var stjórnarformaður Norðlenska matborðsins ehf. frá mars 2008-apríl 2010.  Auður tók við tímabundnu starfi framkvæmdastjóra Lífeyrissjóðs starfsmanna Kópavogsbæjar haustið 2009. Hún situr í stjórn Framtakssjóðs Íslands fyrir hönd lífeyrissjóða og er í stjórn Icelandair Group.

Lífeyrissjóður verkfræðinga var stofnaður í ársbyrjun 1955. Upphaflega var sjóðurinn eingöngu fyrir verkfræðinga en árið 1994 var opnað fyrir aðild annarra sérfræðinga.  Í dag geta þeir orðið sjóðfélagar er lokið hafa 180 eininga BSc háskólaprófi í verkfræði og raungreinum eða hafa lokið meistara- eða doktorsgráðu í háskóla.  

Alls greiddu 2885 sjóðfélagar iðgjöld í sjóðinn á árinu og 3824 áttu réttindi í sjóðnum í árslok.  Hrein eign samtryggingar- og séreignardeildar var rúmlega 31 milljarður króna í árslok 2009 og hjá sjóðnum eru 6 starfsmenn auk framkvæmdastjóra.