Séð yfir Grímsnesið. www.mats.is

Héraðsdómur Reykjaness hefur úrskurðað karlmann í gæsluvarðhald til 22. desember en hann er grunaður um fjölda innbrota í sumarhús í Árnessýslu. Maðurinn var handtekinn eftir að hann hafði kastað þýfi, þar á meðal flatskjá, út úr bíl þegar lögreglan veitti honum eftirför.

Að sögn lögreglunnar á Selfossi bauð lögreglustjórinn á höfuðborgarsvæðinu upp á samstarf embættanna til að stemma stigu við innbrotum í sumarhús á Suðurlandi. Stilltu lögreglumenn á höfuðborgarsvæðinu og Selfossi  saman strengi og skipulögðu eftirlit og upplýsingaöflun og voru margir vegfarendur stöðvaðir á vegum að og frá sumarbústaðahverfum í og við Árnessýslu. 

Snemma á föstudagsmorgun, þegar lögreglumenn voru í einni af þessum eftirlitsferðum, urðu þeir varir við kyrrstæða bifreið á Búrfellsvegi í Grímsnesi.  Bílnum var ekið af stað og lögreglumenn fylgdu honum eftir og skömmu síðar sást að hlutum var kastað út úr bílnum, þar á meðal flatskjá.

Lögreglumennirnir stöðvuðu þá bílinn og reyndust tveir ungir menn vera í honum Annar þeirra var þekktur af fjölda innbrota í Árnessýslu síðastliðið vor. Mennirnir voru handteknir og fluttir á lögreglustöðina á Selfossi og færðir í fangageymslu.  Þeir höfðu um nóttina brotist í eina fjóra bústaði við Álftavatn og Sogið. 

Annar mannanna játaði innbrotin en hinn neitaði.  Sá sem neitaði var með fjölda mála í vinnslu hjá lögreglunni bæði á höfuðborgarsvæðinu og  á Selfossi. Lögreglan á höfuðborgarsvæðinu tók málin yfir og fór fram á síbrotagæslu yfir manninum.