Lífeyrissjóðir fara yfir tillögurnar

Mikil fundarhöld hafa verið undanfarna daga um aðgerðir vegna skulda …
Mikil fundarhöld hafa verið undanfarna daga um aðgerðir vegna skulda heimilanna. Golli / Kjartan Þorbjörnsson

Um 40 forystumenn lífeyrissjóða settust að fundi kl 15 í dag til að fara yfir stöðuna í viðræðunum við stjórnvöld um aðgerðir vegna skuldavanda heimilanna. Um er að ræða hugmyndir um aðgerðir í tíu liðum.

„Við erum að fara yfir stöðu viðræðnanna við ríkið. Fundað var um helgina og að einhverju leyti bæði í dag og á morgun og þá fer væntanlega að koma í ljós hvort menn geta lent einhverju,“ sagði Arnar Sigurmundsson, formaður Landssamtaka lífeyrissjóða, fyrir fundinn í dag.

Fundinn sitja stjórnarformenn, stjórnarmenn og framkvæmdastjórar lífeyrissjóða. Reiknað er með að á fundinum verði ákveðið hvort fulltrúar lífeyrissjóðanna fá umboð til að halda viðræðunum áfram á grundvelli þeirra hugmynda sem nú liggja fyrir.

Fyrr í dag voru fulltrúar stjórnarandstöðunnar boðaðir á fund með fimm ráðherrum þar sem farið var yfir stöðuna í viðræðunum. Er jafnvel búist við að niðurstaða gæti legið fyrir á morgun um mögulegar aðgerðir.

mbl.is
Fleira áhugavert
Fleira áhugavert