Lögreglustöð mbl.is/Eggert

Karlmaður á fertugsaldri var handtekinn í miðborg Reykjavíkur í nótt fyrir að pissa utan í lögreglubíl. Vinir mannsins hvöttu hann áfram en þegar lögreglumenn komu að bílnum hafði maðurinn ekki lokið sér af. Hann reyndi að taka til fótanna og hypja upp um sig brækurnar í leiðinni en ekki vildi betur til en svo að hann hrasar. Var honum þá skellt í járn og hann færður til skýrslutöku. Að sögn lögreglunnar sá maðurinn eftir athæfinu en hann á nú yfir höfði sér sekt. 

Þá var lögreglan á höfuðborgarsvæðinu kölluð út í nótt að íbúð á Nýbýlavegi í Kópavogi vegna rifrildis, en slest hafði upp á vinskap tveggja manna vegna kvennamála. Þegar lögregla kom á vettvang kom 25 ára gamall maður hlaupandi og annar, 38 ára, rakleitt á eftir honum með hníf á lofti. Lögregla gaf manninum skipun um að sleppa hnífnum og veitti hann engan mótþróa við handtöku en hann gistir nú fangageymslu lögreglunnar. Báðir mennirnir voru mikið ölvaðir.