Besti flokkurinn og Samfylkingin lögðu fram fjárhagsáætlun á borgarstjórnarfundi í dag. mbl.is/Eggert

 Besti flokkurinn og Samfylkingin lögðu fram fjárhagsáætlun á borgarstjórnarfundi í dag og segja að mánaðarleg útgjöld hjá meðalfjölskyldu muni aukast um allt að 4.100 krónur  Í tilkynningu frá Sjálfstæðisflokknum segir hins vegar að barnafjölskyldur þurfi að auka útgjöld sín um 100 til 150 þúsund á ári. Útsvar hækkar úr 13,03% í 13,20%, fasteignaskatt úr 0,214% í 0,225% og lóðaleigu úr 0,08% í 0,165%

Á blaðamannafundi spurði mbl.is Dag B. Eggertsson, formann borgarráðs, hvort hann óttaðist ekki að auknar álögur myndu draga úr kaupmætti og þannig ýta undir samdrátt í atvinnulífinu. Hann svaraði að menn hefðu að sjálfsögu alltaf áhyggjur af því þegar svona stæði á. En einmitt þess vegna hefði verið reynt að fara eins vægt í hækkanir  á gjöldum og sköttum og unnt var.

Spurt var einnig hvort reynt yrði að spara í sjálfu Ráðhúsinu, m.a. með því að fækka utanlandsferðum. Var því svarað til að undanfarin ár hefði mjög verið dregið úr slíkum kostnaði. En ekki mætti ávallt líta á það sem bruðl þótt fólk reyndi að kynna sér mál í öðrum löndum. Jón Gnarr borgarstjóri sagðist sjálfur hafa slæma reynslu af utanlandsferðum og honum væri sama þótt þær legðust af.

Í umræðum um fjárhagsáætlunina í borgarstjórn nú fyrir stundu minnti Hanna Birna Kristjánsdóttir oddviti Sjálfstæðisflokksins á  kostnaðarloforð borgarstjóra um að skattar yrðu ekki hækkaðir. Sagði Hanna Birna að nú liti út fyrir að slagorð Besta flokksins „allskonar fyrir borgarbúa“ hefði breyst í „allskonar skatta fyrir borgarbúa“.

Blaðamannafundurinn í dag. mbl.is/Eggert