Keflavíkurflugvöllur. Þorvaldur Örn Kristmundsson

Fyrirtækið Iceland Excursions ætlar í mars að byrja að aka með farþega milli Reykjavíkur og Keflavíkurflugvallar, allt að 10 ferðir á dag. Kynnisferðir eru nú eina fyrirtækið, sem áætlunarferðum á milli þessara staða.  

Fram kemur í tilkynningu frá Iceland Excursions, að þessi nýja þjónusta hafi að undanförnu verið kynnt samstarfsaðilum í ferðaþjónustu og samið hafi verið um akstur við fjölda söluaðila Íslandsferða.

Frá mars og fram til loka maí býður Iceland Excursions upp á sex ferðir á dag milli Reykjavikur og Keflavíkurflugvallar. Frá 1. júní fram í miðjan september verða farnar 10 ferðir á dag. Reiknað er með að ferðir verði jafnvel fleiri þegar áætlanir allra flugfélaga liggja fyrir.
 
Frá Reykjavík verður ekið frá Umferðamiðstöð Iceland Excursions Allrahanda að Hafnarstræti 20 og farþegar verða sóttir á öll helstu hótel og gistiheimili á höfuðborgarsvæðinu. Endanlega staðsetning í og við Flugstöð Leifs Eiríkssonar liggur ekki fyrir, en félagið hefur átt í viðræðum við stjórnendur flugstöðvarinnar um aðstöðu fyrir áætlunarbílinn.

Iceland Excursions er   ferðaþjónustufyrirtæki, rekur ferðaskrifstofu og hópferðabíla. Hjá félaginu starfa um 60 starfsmenn yfir veturinn og sú tala fer yfir 100 á sumrin. Velta félagsins árið 2009 var tæpur einn milljarður króna.
Stærsta verkefni Iceland Excursions er framleiðsla og sala dagsferða fyrir erlenda ferðamenn.