Niðurskurði í heilbrigðiskerfinu var mótmælt um allt land. mbl.is/Ómar

Meðalniðurskurður fjárframlaga til heilbrigðisstofnana á næsta ári verður 9,2%, eins og fjárlög líta nú út í kjölfar endurskoðunar. Áður hafði verið gert ráð fyrir 21,4% niðurskurði að meðaltali, en þeim áformum var mótmælt kröftuglega um land allt.

Fjárlaganefnd Alþingis hefur fjárlagafrumvarpið nú til umsagnar, en vitað var að töluverðar breytingar yrðu gerðar milli umræðna. Í krónum talið verður niðurskurðurinn á heilbrigðisstofnunum dreginn saman um 1700 milljónir, eða ríflega helming. Á upphaflegum fjárlögum var gert ráð fyrir því að skorið yrði niður um 3041 milljón að frátöldum verðlagsbreytingum. 

Milljónirnar 1700 sem veita á aukalega til heilbrigðisstofnana verða m.a. sóttar úr framkvæmdasjóði aldraðra og úr safnliðum sem til eru í heilbrigðisráðuneytinu. Það sem út af stendur, tæpur milljarður, kemur síðan úr ríkissjóði. 

Miðað er við að hvergi þurfi að draga saman um meira en 12%, en í sumum tilfellum eykst niðurskurðurinn frá fyrri tillögum, til að mynda hjá Heilbrigðisstofnun Vesturlands. Anna Sigrún Baldursdóttir, aðstoðarmaður Guðbjarts Hannessonar heilbrigðisráðherra, segir að ekki hefði verið hægt að ná þessum breytingum fram með „flatri“ endurskoðun.

Gert hafði verið ráð fyrir mestum niðurskurði á Heilbrigðisstofnun Þingeyinga og Heilbrigðisstofnuninni á Sauðárkróki, á milli 30 og 40%, en miðað við þær breytingar sem nú liggja fyrir verður hann í báðum tilfellum 12%. Afgangi niðurskurðarins verður „fleytt áfram“ á fjárlagaárið 2012.