Ásta S. Helgadóttir, umboðsmaður skuldara mbl.is/Árni Sæberg

375 beiðnir um greiðsluaðlögun bárust til umboðsmanns skuldara í nóvembermánuði en vinnslu tæplega 90 mála var lokið. Þá bárust embættinu um 60 erindi, flest vegna endurútreikninga bílalána og var 67 erindum svarað í nóvember.  Frá stofnun embættisins, þann 1. ágúst, hafa 521 heimili fengið úrlausn sinna mála hjá embættinu. 

Embættið býður upp á símaráðgjöf og um 3.000 manns hringdi til umboðsmanns í mánuðinum. 558 manns komu í nóvember og fengu ráðgjöf í þjónustuveri. Þá bárust 87 umsóknir um ítarlegri ráðgjöf og 84 slíkum málum var lokið í nóvember, segir í tilkynningu frá umboðsmanni skuldara.

„Alþingi hefur samþykkt breytingar á lögum um greiðsluaðlögun til að tryggja að námsmenn sem sótt hafa um greiðsluaðlögun, geti fengið framfærslulán frá lánastofnunum vegna væntanlegs láns frá Lánasjóði íslenskra námsmanna (LÍN).  Umboðsmaður skuldara telur þetta vera mikilvæga breytingu sem á að tryggja að námsmenn, sem þurfa á greiðsluaðlögun að halda, hrökklist ekki úr námi enda sé framfærsla þeirra áfram tryggð.

Fyrir breytingar fengu námsmenn, sem sótt hafa um greiðsluaðlögun, lán frá LÍN, en höfðu ekki trygga framfærslu fyrr en umsækjandi hafði fullnægt skilyrðum LÍN um framvindu náms.  Bankar og sparisjóðir munu nú veita námsmönnum sem sótt hafa um greiðsluaðlögun framfærslulán, enda muni það lán borgast upp þegar tilskyldum námsárangri hefur verið fullnægt.  
Einnig var samþykkt sú breyting á lögunum að umboðsmaður skuldara getur nú samþykkt að umsækjandi um greiðsluaðlögun selji eign, þrátt fyrir ákvæði um frestun greiðslna. Samþykkið er háð því skilyrði að salan muni auðvelda umsækjanda að koma á jafnvægi milli skulda og greiðslugetu.

Fyrir breytingar var það svo að ef umsækjendur um greiðsluaðlögun sem voru að reyna að selja eignir til að borga niður skuldir, fengu tilboð í eignina, þá máttu þeir ekki selja. Eina ráðið var að draga umsóknina til baka á meðan salan gekk í gegn. Nú er þetta breytt og hægt er, með samþykki umboðsmanns skuldara, að selja eignir. Þegar sala hefur farið fram, þá skal byrja á því að greiða upp áhvílandi veðskuldir. Sé hagnaður af sölu, skal hann varðveittur á sérstökum vörslureikningi þar til frestun greiðslna lýkur," segir í tilkynningu.