Steingrímur Ari Arason.

 „Við gerum ráð fyrir að finna viðunandi úrræði fyrir skjólstæðingana á næstu þremur mánuðum,“ segir Steingrímur Ari Arason, forstjóri Sjúkratrygginga Íslands.

Steingrímur Ari sagði, að þjónustan muni fyrst og fremst færast til heilsugæslunnar og á Landspítalann. „Við erum með heimaþjónustusamning við Landspítalann, í versta falli þyrftum við að grípa til innlagna.“

Svanhvít Jakobsdóttir, forstjóri Heilsugæslu höfuðborgarsvæðisins, sagði í samtali við Morgunblaðið að ekki hefði verið rætt við heilsugæsluna um þetta fyrirkomulag.

Steingrímur Arni segir, að samkvæmt fjárlagafrumvarpinu þurfi stofnunin  að lækka kostnað við þessa þjónustu um 27% á næsta ári. Þetta feli klárlega í sér minni þjónustu til barnanna.

Sjúkratryggingar eru með samning við fjögur heimaþjónustuteymi, hin þrjú sinna krabbameinssjúklingum og öldruðum. Samningurinn við Heilsueflingarmiðstöðina er eini samningurinn sem segja á upp. Ástæðan er, að sögn Steingríms, að hægara er um vik að veita langveikum börnum þjónustu en þeim sem þiggja þjónustu hinna teymanna.

Guðbjartur Hannesson, heilbrigðisráðherra, segist hafa kallað eftir ítarlegri upplýsingum varðandi þetta mál frá Sjúkratryggingum Íslands. „Við gerum ráð fyrir að börnin fái ennþá viðunandi þjónustu og það er ekki stefna ráðuneytisins að leggja af heimaþjónustu.“