Slökkviliðsmenn að störfum í stórbruna í Hafnarfirði mbl.is/Júlíus

„Það er engin launung, varðandi þessa greiðslu, að það eru mikil vonbrigði meðal slökkviliðsmanna með þessa afgreiðslu. Starfsmenn Slökkviliðs höfuðborgarsvæðisins eru bara mjög reiðir út af þessari afgreiðslu hjá stjórninni,“ segir Finnur Hilmarsson, slökkviliðsmaður og einn fulltrúa Landssambands slökkviliðs- og sjúkraflutningamanna (LSS) hjá Slökkviliði höfuðborgarsvæðisins (SHS).

Líkt og greint var frá í gær meinaði stjórn SHS, sem skipuð er forsvarsmönnum sveitarfélaganna, slökkviliðsstjóra höfuðborgarsvæðisins að halda áfram að greiða áhættuálag til slökkviliðsmanna eftir síðastliðin mánaðamót. Stjórnin lýsti jafnframt vonbrigðum sínum með þá ákvörðun að greiðslan skyldi innt af hendi. Um er að ræða 15 þúsund krónur mánaðarlega, umfram kjarasamninga.

Fulltrúar Landssambandsins hjá Slökkviliði höfuðborgarsvæðisins hafa sent stjórninni, sem og fleiri aðilum, bréf þar sem vinnubrögð stjórnar SHS og Sambands íslenskra sveitarfélaga, varðandi niðurfellingu álagsgreiðslunnar, eru fordæmd.

Mikil óánægja er meðal slökkviliðsmanna með niðurfellinguna. „Verði ekkert að gert í málinu má búast við ófyrirséðum afleiðingum sem gætu valdið röskun á starfsemi slökkviliðsins,“ segir í bréfinu. Sú röskun sé alfarið á ábyrgð stjórnar SHS og Sambands íslenskra sveitarfélaga.

„Óeðlilegt er að ekki hafi verið rætt við fulltrúa starfsmanna í tengslum við þá ákvörðun og teljum við því ljóst að allar grundvallarreglur stjórnsýslulaga hafi verið brotnar þar sem stjórn SHS hafi ekki kynnt sér sjónarmið beggja aðila,“ segir í bréfinu.

Farið hefur verið fram á fund með stjórn SHS í síðasta lagi 8. desember næstkomandi.

Samkvæmt bréfi fulltrúa LSS bauð sviðstjóri kjarasviðs Sambands íslenskra sveitarfélaga það að álagsgreiðsla til slökkviliðsmanna á höfuðborgarsvæðinu yrði sett inn í kjarasamninga, „til að greiða fyrir gerð nýs kjarasamnings.“ Því boði hafi verið hafnað, þar sem um hefði verið að ræða launahækkun fyrir hluta meðlima, og fordæma fulltrúar LSS þessi vinnubrögð.

Þeir upplifi framgöngu viðsemjenda sinna sem „hefndaraðgerðir,“ vegna aðgerða í tengslum við síðustu kjarasamningsgerð.

Kjarasamningar slökkviliðsmanna eru nú lausir, líkt og annarra stéttarfélaga. „Við erum búnir að óska eftir fundi með Launanefnd sveitarfélaganna, en þeir hafa ekki svarað ennþá,“ segir Finnur. Hann bendir á það að síðustu kjarasamningar slökkviliðsmanna hafi dregist um heilt ár. Þeir hafi hins vegar ekki fengið neitt greitt afturvirkt. „Manni finnst þetta mjög óheiðarlegt, að draga lappirnar í kjarasamningagerð. Svo er aldrei greitt afturvirkt,“ segir Finnur.

Spurður að því hvort það séu ekki hagsmunir launagreiðenda að draga samningsgerð sem lengst, segir Finnur: „Maður upplifir þetta svolítið þannig, sérstaklega eins og staðan er í þjóðfélaginu í dag.“