Óttast að fjárþörf Íbúðalánasjóðs sé meiri
Íbúðalánasjóður mbl.is/Árni Sæberg
Sigríður Ingibjörg Ingadóttir, þingmaður Samfylkingarinnar, segir enn vanta upp á að fjárþörf Íbúðalánasjóðs sé skýrð með fullnægjandi hætti. Lengi hafi legið fyrir að reynt gæti á ríkisábyrgð sjóðsins, og því sé mikilvægt að fjárveiting til hans sé ítarlega ígrunduð.
Þriðja umræða um frumvarp til fjáraukalaga hefur staðið yfir í allt kvöld, og einkum snúist um málefni Íbúðalánasjóðs. Fulltrúar Sjálfstæðisflokksins í fjárlaganefnd hafa gagnrýnt harðlega það sem þeir segja „skort á yfirsýn“ yfir fjármál sjóðsins. Fjárþörf hans hafi ýmist verið metin 18 eða 22 milljarðar.
Sigríður Ingibjörg tekur undir með Sjálfstæðisþingmönnunum hvað það varðar ekki að ekki hafa verið gerð nægilega glögg grein fyrir fjárþörf sjóðsins. Sameiginlegur fundur félags- og tryggingmálanefndar, hverrar hún er formaður, og fjárlaganefndar hafi ekki svarað þeim spurningum sem upp hafi komið.
Skv. upplýsingum sem nefndirnar fengu gætu fjárþörf sjóðsins á árunum 2010-2011 verið 35-43 milljarðar. „Ég óttast að þörfin gæti verið mun meiri, en hef ekki gögn til að styðja það frekar,“ sagði Sigríður í ræðu sinni. En nefndi þó nokkrar vísbendingar.
Þegar hafi 11 milljarðar verið afskrifaðir vegna krafna á lánastofnanir, m.a. vegna afleiðusamninga. Hugsanlega gæti þurft að afskrifa 6 milljarða því til viðbótar.
Á næstum árum er jafnframt ráðgert að afskrifa þurfi 21 milljarð af lánasafni sjóðsins, en þar er um að ræða lán til einstaklinga, eignarhaldsfélaga og þar fram eftir götum. Aðgerðaáætlun vegna skuldavanda heimilanna, sem kynnt var nú fyrir helgi, felur það í sér að afskrifa þurfi 10-13 milljarða. Ekki liggur fyrir hversu mikil skörun er þarna á milli.
Vill rannsókn á starfsemi Íbúðalánasjóðs
Sigríður er einn flutningsmanna þingsályktunartillögu um að fram fari sjálfstæð rannsókn á starfsemi Íbúðalánasjóðs „frá aðdraganda breytinganna á fjármögnun og lánareglum Íbúðalánasjóðs sem hrint var í framkvæmd á árinu 2004. Í kjölfar þess fari fram heildarendurskoðun á stefnu og starfsemi Íbúðalánasjóðs.“
Hún lagði á það áherslu í málflutningi sínum í kvöld að sé ætlunin að samþykkja stóra aukafjárveitingu til Íbúðalánsjóðs sé mikilvægt að þingsályktunartillagan verði samþykkt og rannsókn fari fram.
„Með rannsókn fæst glögg mynd af því hvað misfórst í rekstri sjóðsins, og hægt að koma í veg fyrir að fjárhagsafglöp endurtaki sig með ábyrgð sjóðsins,“ sagði hún.
Sigríður Ingibjörg Ingadóttir, þingmaður Samfylkingarinnar.
