Villtum refum hefur fjölgað nánast um allt land, að sögn Guðbrands Sverrissonar, bónda á Bassastöðum í Strandasýslu og refabana. „Við heyrum meira af dýrbítum í haust en verið hefur undanfarið,“ sagði Guðbrandur.
Ljótar fregnir af dýrbitnu fé hafa borist úr Borgarfirði og víðar að. Þá eru tófur svo kræfar að þær hafa ráðist á fé heima við bæi, m.a. í Skagafirði. Líklega er það ætisskortur sem veldur bífræfninni, að því er segir í umfjöllun um þetta mál í Morgunblaðinu í dag.