Orkuveita Reykjavíkur. mbl.is/Árni Sæberg

Settur umboðsmaður Alþingis tók að eigin frumkvæði til athugunar ákvarðanir og stjórnsýslu Reykjavíkurborgar í tengslum við samning hennar við Orkuveitu Reykjavíkur (nú Gagnaveitu Reykjavíkur) um lagningu ljósleiðara. Komst umboðsmaður, Róbert R. Spanó, að þeirri niðurstöðu að ekki væri ástæða til að aðhafast frekar en kom ábendingum á framfæri til borgarinnar um eftirlitsskyldu við gerð sambærilegra samninga.

Annars vegar laut athugun umboðsmanns Alþingis að þeim lagagrundvelli og heimildum sem Reykjavíkurborg hafði til að gera umræddan samning. Hins vegar laut athugunin að því hvort efni samningsins, hefði Reykjavíkurborg haft heimild til gerðar hans, fullnægði þeim skyldum sem á borginni hvíldu við útfærslu þjónustu við íbúa og fasteignareigendur sveitarfélagsins.

Settur umboðsmaður rekur m.a. ákvæði sveitarstjórnarlaga þar sem kemur fram að borgin hefði sett fram það markmið að stuðla að eflingu upplýsingasamfélagsins og nýtingu upplýsingatækni til „hagsbóta fyrir fyrirtæki og einstaklinga í borginni“. Jafnframt telur settur umboðsmaður með hliðsjón af því lagaumhverfi sem gildir um fjarskipti að hann hafi ekki forsendur til að gera athugasemd við þá skýringu samgöngu- og sveitarstjórnarráðuneytisins til hans að sú þjónusta sem Gagnaveita Reykjavíkur veitti teldist ekki til alþjónustu.

„Að þessu virtu og eins og atvikum var háttað þegar samningur Reykjavíkurborgar og Orkuveitu Reykjavíkur var gerður var það niðurstaða setts umboðsmanns að hann hefði ekki forsendur til athugasemda við aðkomu Reykjavíkurborgar að uppbyggingu eða lagningu ljósleiðaranets í borginni með því að gera samninginn. Settur umboðsmaður taldi í ljósi skýringa samgöngu- og sveitarstjórnarráðuneytisins ekki tilefni til að aðhafast út af þeirri fyrirspurn hans sem laut að því hvort efni samningsins fullnægði þeim skyldum sem hvíldu á Reykjavíkurborg við útfærslu þjónustu við íbúa og fasteignareigendur,“ segir í áliti umboðsmanns. Því telur settur umboðsmaður ekki ástæðu til að aðhafast frekar út af málinu á grundvelli heimildar sinnar til að taka mál til athugunar að eigin frumkvæði, og lauk því frumkvæðisathugun sinni.

Ábending til Reykjavíkurborgar

Settur umboðsmaður ritaði þó bréf til Reykjavíkurborgar í tilefni af athugasemdum hennar til hans í bréfi. Þar tók hann m.a. fram að það væri í betra samræmi við sjónarmið um vandaða stjórnsýsluhætti að kveða skýrlega í samningi borgarinnar og Orkuveitu Reykjavíkur (nú Gagnaveitu Reykjavíkur) á um útfærslu þjónustu við fasteignareigendur, eftirlitsskyldu borgarinnar og að samþykkti fasteignareigandi ljósleiðaratengingu þá yrði samið við hann um eignarhald og notkun tengibúnaðar til framtíðar. Settur umboðsmaður beinir þeirri ábendingu til Reykjavíkurborgar að hún hafi framvegis í huga afstöðu samgöngu- og sveitarstjórnarráðuneytisins varðandi eftirlitsskyldu borgarinnar við gerð samninga sem eru af sama tagi og í umræddu máli.