Löggan er komin á Facebook.

Lögreglan á höfuðborgarsvæðinu er komin á Facebook. Tilgangurinn með því er að auka og efla upplýsingamiðlun frá lögreglunni til almennings, einkum þeirra sem búa, starfa og dvelja á höfuðborgarsvæðinu, að sögn lögreglunnar.

Siðan verður notuð til að vekja athygli á fréttum og tilkynningum frá lögreglunni, forvörnum gegn afbrotum og sambærilegu efni. Lögreglan bendir þeim sem vilja gerast „góðkunningjar“ hennar - í orðsins fyllstu merkingu - að fara á þessa slóð.

Uppfært klukkan 15.30

Um klukkan 15.30 höfðu meira en 1.100 notendur Facebook lýst ánægju sinni með framtak lögreglunnar. Síðan var sett upp laust fyrir hádegið í dag. Stefán Eiríksson, lögreglustjór á höfuðborgarsvæðinu, sagði þetta miklu betri viðtökur en hann átti von á. 

„Þetta er eðlilegt skref hjá lögreglunni,“ sagði Stefán um ástæðu þess að lögreglan fór á Facebook. „Lögreglan á að vera sýnileg alls staðar í samfélaginu. Þarna er fólkið og þá er nauðsynlegt að lögreglan sé þar líka.“

Lögreglan leggur ákveðnar línur um hvað á heima sem innlegg á síðuna. Stefán sagði að síðan sé fyrst og fremst hugsuð til að miðla upplýsingum. Hún verði einnig opin til að taka við hvatningu eða ábendingum.

„Þetta er ekki vettvangur til að miðla upplýsingum til lögreglunnar um einstök tilvik, lögbrot eða annað. Við notum aðrar leiðir til þess að taka við því,“ sagði Stefán.

Lögregla höfuðborgarsvæðisins (LRH) bætist nú í hóp lögregluliða víða um heim sem nota Facebook.  LRH er þó líklega fyrsta löggæslustofnunin hér á landi sem notar þessa samskiptaleið. 

Stefán sagði að reynt verði að hafa síðu lögreglunnar lifandi og setja eitthvað nýtt inn á hverjum degi. Hann benti á að lögregluvefurinn sé vel virkur og ein helsta leið lögreglunnar til upplýsingamiðlunar.

Hann sagði að Facebook síðan sé hrein viðbót við lögregluvefinn.

„Við vonumst til þess að fá enn fleiri vini. Það er alltaf gott að eiga „góðkunningja“,“ sagði Stefán.

Stefán Eiríksson, lögreglustjóri. mbl.is/Júlíus