mbl.is/Jón H. Sigmundsson

Hinn 1. janúar 2010 var 26.171 innflytjandi á Íslandi eða 8,2% mannfjöldans. Það er fækkun frá árinu 2009, þegar innflytjendur voru 9,0% landsmanna og 28.644 alls. Nokkuð hefur fjölgað í annarri kynslóð innflytjenda á milli áranna 2009 og 2010 eða úr 1.898 í 2.254.

Samanlagt var fyrsta og önnur kynslóð innflytjenda 8,9% af mannfjöldanum 1. janúar 2010, en var 9,6% árið 2009. Einstaklingum með erlendan bakgrunn, öðrum en innflytjendum, fjölgaði lítillega frá 2009 til ársins 2010, úr 5,8% í 6% mannfjöldans, segir í frétt á vef Hagstofu Íslands.

„Innflytjandi er einstaklingur sem er fæddur erlendis og af foreldrum sem eru líka fæddir erlendis, sem og báðir afar og ömmur. Önnur kynslóð innflytjenda eru einstaklingar sem eru fæddir á Íslandi af foreldrum sem eru báðir innflytjendur. Fólk með erlendan bakgrunn eru þeir sem eru fæddir erlendis af íslensku foreldri eða fæddir á Íslandi og annað foreldrið útlent," segir á vef Hagstofunnar.

Pólverjar fjölmennastir innflytjenda

Eins og síðustu ár voru Pólverjar langfjölmennasti hópur innflytjenda hér á landi árið 2010. Alls eru 10.058 einstaklingar upprunnir frá Póllandi eða 38,4% allra innflytjenda. Pólskir karlar voru 43,5% allra karlkyns innflytjenda 1. janúar 2010, eða 5.719 af 13.162. Pólskar konur voru 33,4% kvenkyns innflytjenda. Næstfjölmennasti hópur innflytjenda  fæddist í Litháen, 5,5% en 5,0% innflytjenda fæddust á Filippseyjum.

Svipað hlutfall karla og kvenna

Kynjahlutfall, reiknað sem fjöldi karla á hverjar 1.000 konur, hefur sveiflast mikið á síðustu árum meðal innflytjenda. Árið 1996 voru konur í miklum meirihluta. Þá voru 607 karlar á hverjar 1.000 konur meðal innflytjenda. Frá og með 2006 snerist kynjahlutfallið við og náði hæst  1.353 körlum á hverjar 1.000 konur árið 2007. Þann 1. janúar 2010 var kynjahlutfallið orðið nánast jafnt, eða 1.012 karlar á hverjar 1.000 konur og var orðið nánast hið sama og hjá hópnum með engan erlendan bakgrunn, 1.013 karlar á hverjar 1.000 konur.