Lögreglan á Sauðárkróki hafði hendur í hári tveggja manna sem tóku lítinn fólksflutningabíl traustataki um helgina og óku honum suður til Reykjavíkur og til baka. Lýst var eftir bílnum á sunnudag og kom hann í leitirnar í gærmorgun.

Að sögn lögreglu er um góðkunningja þeirra að ræða. Ökumaðurinn er sagður með aðsetur á Sauðárkróki en félagi hans er búsettur þar. Eru þeir grunaðir um að hafa verið undir áhrifum fíkniefna við aksturinn. Fólksflutningabílnum var skilað heilum til baka og ekki er vitað til þess að þeir hafi tekið með sér fleiri farþega um borð í ferðinni suður.

Tóku þeir bílinn aðfaranótt laugardagsins og skiluðu honum til baka um kvöldið, reyndar á annan stað í sama iðnaðarhverfi og rútufyrirtækið er til húsa. Þjófnaðurinn uppgötvaðist ekki fyrr en á sunnudag. Lýsti lögregla þá eftir honum og kom bílinn í leitirnar í gærmorgun, ekki á sunnudagskvöld eins og fram kom á mbl.is í gær. Höfðu félagarnir falið bílinn kyrfilega á bakvið gám.