„Var eins og að sigla á klett“
Bjarni Sigurðsson, útgerðarmaður í N-Noregi. mbl.is/eskoy.no
„Veðrið var ekki svo slæmt, kaldaskítur að sunnan en var að bæta í vindinn. Þeir lentu í rosalega stórri öldu og þetta var eins og að sigla á klett, alveg þverhnípt. Það dugði ekki að slá af þegar skipstjórinn sá ölduna koma," segir Bjarni Sigurðsson, eigandi bátsins Sögu sem fékk brotsjó á sig undan ströndum N-Noregs í gær. Þrír Íslendingar voru um borð og björguðust þeir allir um borð í þyrlu.
Illa tókst að koma togi í bátinn í gær og urðu togbátar frá að hverfa. Var stór dráttarbátur fenginn til leitar, auk þess sem annar bátur í eigu sömu útgerðar, Eskoy AS, aðstoðaði við leitina. Að sögn Bjarna fannst Saga í morgunsárið og er verið að draga bátinn til hafnar í Honningsvog, rétt hjá Nordkap í N-Noregi. Ekki er vitað nákvæmlega hvað skemmdir eru miklar, annað en að allur búnaður í stýrishúsi er ónýtur og innréttingar í lúkar. Vélarrúmið er hins vegar þurrt, að sögn Bjarna, og allt útlit fyrir að aflinn um borð, 10 tonn, sé í lagi.
„Við munum landa fiskinum um leið og báturinn kemur til hafnar í kvöld," segir Bjarni en Saga komst nýverið í fréttirnar í N-Noregi fyrir aflamet í nóvembermánuði, þegar um 100 tonn náðust á línuveiðum þann mánuðinn. Um er að ræða plastbát smíðaðan árið 2007 af Trefjum í Hafnarfirði.
Skipverjarnir eru heilir á húfi eftir volkið, allt ungir en vanir sjómenn. Grindvíkingurinn Hrafn Sigvaldason er skipstjóri og með honum um borð voru Almar Ásgeirsson og Guðmundur Kr. Albertsson. Hrafn var við stýrið er aldan reið yfir en hinir sátu að snæðingi þar sem spaghettí var á boðstólum.
Gekk illa að bjarga bátnum
Bjarni segist hafa fengið fregnir af því um hálfníuleytið í gærmorgun að neyðarkall hefði borist frá bátnum. Hann var þá búinn að vera að veiðum frá því á laugardagskvöld og var á heimleið.
„Báturinn fannst fljótlega og þá voru þeir beðnir um að yfirgefa hann og bíða eftir aðstoð frá þyrlu," segir Bjarni.
Björgunarbátur var sendur af stað til að ná Sögu á flot. Þá var veður orðið vont og ekki tókst að koma manni um borð. Illa gekk að koma dráttartaug um borð og segir Bjarni að hún hafi slitnað tvisvar áður en að menn hafi gefist upp.
Stór dráttarbátur, sem yfirleitt er kallaður til aðstoðar við stærri skip, var þá sendur á vettvang og fannst Saga ekki í fyrstu. Stóð leit yfir að bátnum fram á nótt en undir morgun fannst hann, marandi í hálfu kafi.
„Við höfum aldrei lent í svona óhappi áður en Saga strandaði þó í fyrra á heimstími. Báturinn flaut þá af strandstað og tók aðeins viku að gera við hann. Var vel sloppið þá og við gerum okkur vonir um það núna að Saga verði komin á sjó eftir nokkrar vikur," segir Bjarni og á von á aðstoð frá Trefjum í Hafnarfirði við verkið.
Bjarni hefur verið búsettur í Noregi síðan 1980. Byrjaði með útgerð árið 2003 og stofnaði fyrirtækið Eskoy árið 2007. Þá var Saga smíðuð en fyrir er Bjarni með annan fiskibát.
Trefjar í Hafnarfirði smíðuðu Sögu árið 2007. mbl.is/eskoy.no
