Um 40 milljónir króna söfnuðust í þjóðarátakinu „Á allra vörum", sem fram fór í sumar. Átakinu var ætlað að safna fé til styrktar kaupa á nýju húsnæði Ljóssins, endurhæfingar og stuðningsmiðstöð fyrir fólk sem fengið hefur krabbamein. 

Tugir þúsunda tóku þátt í átakinu með kaupum á varaglossi frá Dior, auk þess að ráðist var í sérstakan söfnunarþátt á Skjá einum þar sem um 33.000.000 krónur söfnuðust, samkvæmt tilkynningu.

Í dag, 8. desember afhentu þær Elísabet Sveinsdóttir, Gróa Ásgeirsdóttir
og Guðný Pálsdóttir  Ernu Magnúsdóttir frá Ljósinu, peningana. Átakið má rekja til Gróu Ásgeirsdóttur, sem sjálf gekk í gegnum krabbameinsmeðferð fyrir nokkrum árum, en átakið fór nú fram í þriðja sinn.  „Markmiðið var að leggja Ljósinu lið og vekja athygli á þeirra frábæra starfi. Að safna tæpum 40 millj. kr. er bara bónus og sýnir hvað þjóðin er rausnarleg þegar kemur að stuðningi við slík málefni, “ segir Gróa en auk hennar standa þær Guðnýju Pálsdóttir, Elísabet Sveinsdóttir að Á allra vörum, samkvæmt tilkynningu.