Reuters

„Fréttir um mögulega kynningu á óorðnum samningi eða óorðnum hlutum eru ekki frá fjármálaráðuneytinu komnar. Ég hygg að við myndum reyna að standa að því á þann hátt sem eðlilegast er,“ sagði Steingrímur J. Sigfússon fjármálaráðherra þegar hann var spurður um stöðu Icesave-samningsins í óundirbúnum fyrirspurnartíma á Alþingi.

Ólöf Nordal, þingmaður Sjálfstæðisflokksins, sagði að það væri óskiljanlegt að heyra í fréttum að það ætti að upplýsa fjölmiðla um verðandi Icesave-samning áður en hann væri kynntur þinginu.

„Væntanlega yrði fyrst byrjað á því að samninganefndin kynnti formönnum stjórnmálaflokkanna þá niðurstöðu sem hún hefði komist að, eða þann mögulega samning sem kynni þá að vera hægt að gera. Þetta einfaldlega snýr þannig að samninganefndin er að reyna til þrautar að komast að niðurstöðu um það hvernig gæti samningur litið út. Hvert gæti orðið efnisinntak hans. Hann verður að sjálfssögðu ekki undirritaður á því stigi málsins,“ segir Steingrímur.

Hann gerir ráð fyrir því að fyrsta skrefið verði að kynna niðurstöðuna formönnum alla stjórnmálaflokkanna. Þingflokkum og þingnefndum væntanlega í framhaldinu.

Steingrímur bætti við að hann geti ekki farið að tala um ávinning af einhverju sem sé ekki orðið. „Við höfum forðast það, í þágu málsins, að staðfesta eða birta tölulegar upplýsingar á meðan niðurstaða liggur ekki fyrir. Þá myndi það ekki hjálpa til. Þannig að hin mögulega niðurstaða sem slík, eða samanburður hennar við aðra hluti er ekki tímabær á þessu stigi.“

Spurður hvort áhættan hafi verið metin af því að málið kynni að lenda fyrir dómstólum segir Steingrímur að það hafi að sjálfssögðu verið gert.

„Það hefur tengst lagalegum undirbúningi að því að svara Eftirlitsstofnun EFTA. Öll lagarök og allar lagalegar áhættur hafa verið greindar í því ferli.“ Áhættan sé til staðar en á móti séu gengisvarnir sem séu innbyggðar í gegnum það að búið eigi umtalsverðar eignir og fái tekjur í erlendri mynt.

Steingrímur J. Sigfússon. mbl.is/Ómar