Slysið varð í Reykjadal í sumar. mbl.is/Þorgeir

Alvarlegt umferðarslys sem varð í Reykjadal við bæinn Einarsstaði 21. júlí í sumar má rekja til þess að  hemlar bifreiðarinnar ofhitnuðu þegar henni var ekið niður um 3 km langa brekku niður af Fljótsheiði.

Þetta kemur fram í skýrslu Rannsóknarnefndar umferðarslysa. Í slysi hlutu nokkrir farþegar alvarlega áverka, en í henni voru 15 erlendir ferðamenn. Neðst í brekkunni eru T-vegamót og þegar ökumaðurinn ætlaði að hægja á bifreiðinni við vegamótin hættu hemlarnir að virka með þeim afleiðingum að bifreiðin fór útaf veginum og valt á hliðina.

Rétt áður en bifreiðin kom að vegamótunum, varð ökumaðurinn var við að hemlarnir hættu að virka. Í sömu mund tilkynnti hann farþegum að bifreiðin væri hemlalaus þeim til viðvörunar. Ökumaðurinn áttaði sig fljótlega á, að ekki var gerlegt að ná beygjunni til hægri og reyndi hann því að ná vinstri
beygjunni sem er ekki alveg eins kröpp. Ökuhraðinn var hins vegar það mikill að bifreiðin fór að skrika til og lenti svo út af veginum og þar sem hún valt á hliðina. Samkvæmt ökuritaskífu var hraðinn milli 70 og 80 km/klst. niður brekkuna en var kominn niður í 60 km/klst. við vegamótin. Bifreiðin stöðvaðist á hægri hlið um 15 metra fyrir utan veginn.

Áverkar sem þessir aðilar hlutu voru meðal annars; samfallsbrot í baki, mjaðmagrindarbrot, rifbeinsbrot og innvortis blæðingar. Farþegarnir sem hlutu alvarlegustu meiðslin sátu allir vinstra megin í bifreiðinni. Farþegar sem sátu fremst voru spenntir í öryggisbelti, en ekki náðist að staðfesta öryggisbeltanotkun þeirra sem aftar sátu.

Rútan var orðin 27 ára gömul. Nefndin telur að hemlar hennar hafi ofhitnað þegar hún fór niður brekkuna. Þegar hemlar ofhitna minnkar viðnám milli hemlaborða og skála með þeim afleiðingum að hemlageta minnkar mikið sem og að hemlavökvi getur soðið. Við rannsókn málsins komu fram ábendingar um að hemlakerfi bifreiðarinnar hafi þurft talsvert viðhald. Umrædd bifreið hafði áður misst hemlagetu og lent út af vegi vegna ofhitnunar hemlanna.