Bakkavör sökuð um að koma illa fram við starfsmenn
Starfsmenn Bakkavarar í Lincolnshire á Englandi ætla að efna til mótmæla á föstudaginn, en þeir segja að aðstæður starfsfólks séu bágbornar. Fólki sé sagt upp störfum og laun lækkuð.
Mótmælin verða í Spalding þar sem höfuðstöðvar Bakkavarar í Bretlandi eru. Þeir sem standa að mótmælunum hafa skorað á fólk að mæta og sýna andúð á starfsháttum fyrirtækisins. Í bréfi þar sem skorað er á fólk að mótmæla segir að starfsmenn Bakkavarar í Lincolnshire „búi við eina þær verstu starfsaðstæður sem þekkist í Bretlandi.“
Í bréfinu segir að verið sé að reyna að þvinga starfsfólk Bakkavarar til að taka á sig kostnað vegna mistaka sem stjórnendur fyrirtækisins hafi gert í rekstrinum.
Á vef Starfsgreinasambandsins kemur fram að þeir Bakkabræður, Ágúst og Lýður Guðmundssynir ráðist til atlögu gegn verkafólki við ávaxta- og grænmetisiðju Bakkavarar í Bourne í Lincolnshire í Englandi.
Það er breska verkalýðssambandið Unite the Union, systursamtök Starfsgreinasambands Íslands, sem stendur fyrir mótmælunum. Markmið mótmælanna er að senda skýr skilaboð til stjórnenda Bakkavarar að Unite muni aldrei láta það gerast að félagsmenn þess verði þvingaðir til þessa niðurskurðar baráttulaust.
„Unite heldur því fram að þeir Bakkabræður hafi hundsað allar tillögur um samráð við verkalýðshreyfinguna, hvað þá tekið tillit til sjónarmiða hennar um endurskipulagningu í Bourne. Bakkavör heldur því fram að fyrirtækið þurfi að spara fimm milljónir punda til að stöðva taprekstur en Unite telur að tapreksturinn, sé um taprekstur að ræða, stafi fyrst og fremst af óhæfum stjórnendum fyrirtækisins og stjórnunarstíl þeirra.
Bakkabræður hafa ekki getað sýnt fram á að niðurskurðurinn sé nauðsynlegur vegna rekstrarins. Unite telur einnig að Bakkavör sé að keyra í gegn niðurskurðinn í Bourne fyrir áramót til þess að komast hjá nýrri löggjöf, the Agency Worker Regulations, um að fyrirtæki skuli meðhöndla alla starfsmenn jafnt og gengur í gildi á næsta ári. Unite mótmælir því að verkafólk í Bourne og fjölskyldur þess sé látið borga fyrir stjórnunarmistök Bakkabræðra," segir á vef Starfsgreinasambandsins.
