Icesave-samningarnir á netinu
Samninganefnd Íslands kynnti Icesave-samningana í síðustu viku. mbl.is/Kristinn
Samningarnir sem Ísland gerði við Breta og Hollendinga fyrr í þessum mánuði hafa verið birtir á netinu. Samningurinn við Breta er um 30 blaðsíður, en samningurinn við Hollendinga er um helmingi lengri.
Þrjú fylgisskjöl fylgja samningunum, m.a. samningur milli Tryggingarsjóðs innistæðueigenda og hollenska seðlabankans. Samningamenn Íslands settu stafina sína undir samningana 8. desember sl. Fjármálaráðherra mun mæla fyrir samningnum á Alþingi í þessari viku. Síðan fara þeir til þingnefndar sem mun kalla eftir umsögnum um þá. Stefnt er að því að atkvæði verði greidd um samningana þegar þing kemur saman eftir áramót, að lokinni umræðu um málið.
Lárus Blöndal, fulltrúi stjórnarandstöðunnar í Icesave-samninganefnd Íslands segir að sú niðurstaða sem samninganefndir landanna þriggja komust að í Lundúnum fyrir helgi, séu ekki bindandi samningar.
„Menn verða að hafa það í huga, þegar þeir vega og meta þá niðurstöðu sem við komumst að. Það er ekki hægt að setja ákvæði um gildistíma samnings sem er ekki í gildi,“ sagði Lárus í samtali við Morgunblaðið í gær.
Lárus var spurður hvort í þeirri niðurstöðu sem samningamenn landanna þriggja settu stafi sína við í síðustu viku væri ákvæði um það að Hollendingar og Bretar gætu sagt sig frá samningum við Ísland, ef ekki væri búið að festa Icesave í lög um áramótin. Hann segir það ákvæði fela í sér yfirlýsingu af hálfu Breta og Hollendinga um að þeir vilji fara að ljúka málinu. Þetta ákvæði ætti því ekki að hafa nein áhrif á málið umfram það.
