Framtíð íslensks háskólasamfélags var rædd á Alþingi í dag. mbl.is/Ómar

Framtíð íslensks háskólasamfélags var var rædd í umræðum utan dagskrár á Alþingi í dag að frumkvæði Höskuldar Þórhallssonar, þingmanns Framsóknarflokksins. Í umræðum þingmanna kom fram að nauðsynlegt væri að efla gæði íslensks háskólanáms og auka samvinnu. Slíkt væri árangursríkasta leiðin út úr kreppunni.

Í ræðu sinni spurði Höskuldur meðal annars að því hvort þjóðin hefði efni á því að halda uppi tveimur háskólakerfum, opinberu og einkareknu.

„Það er nauðsynlegt að samstilla háskólanám. Það gengur ekki til lengdar að kenna sams konar nám beggja vegna við Vatnsmýrina,“ Höskuldur.

Þeir þingmenn sem kváðu sér hljóðs í umræðunni voru allir sammála því að auka þyrfti samvinnu háskólanna í landinu. Ólína Þorvarðardóttir, þingmaður Samfylkingarinnar, sagði að vera kynni að sá öri vöxtur sem hafi orðið í háskólum landsins undanfarin ár hafi bitnað á gæðum. Nú væri nauðsynlegt að hlúa að háskólunum og tryggja þeim nægilegt fjármagn.

Þorgerður Katrín Gunnarsdóttir, þingmaður Sjálfstæðisflokksins, vísaði til kjörorða breska verkamannaflokksins þegar Tony Blair komst til valda; menntun, menntun, menntun. Með sama hætti ættu íslensk stjórnvöld að hafa menntun að leiðarljósi með kjörorðunum ; gæði, gæði, gæði.

Katrín Jakobsdóttir, menntamálaráðherra, sagðist fagna umræðum um málefni háskólanna. Hún nefndi meðal annars að setta hafi verið á fót nefnd erlendra sérfræðinga sem eigi að sjá um gæðaeftirlit með íslenskum háskólum.