Fleiri styrktarforeldra þörf
Þriggja ára drengur í Pakistan, þar sem ABC barnahjálp rekur skóla fyrir 3.000 börn. ATHAR HUSSAIN
Þótt opinber framlög Íslands til þróunarmála séu hlutfallslega lítil miðað við aðrar vestrænar þjóðir hafa Íslendingar þó verið duglegir að leggja þróunarmálum lið með einstaklingsframlögum. Eftir kreppu hefur þrengt að þessu starfi en á meðan sum hjálparsamtök hafa misst styrktaraðila hefur þeim fjölgað hjá öðrum.
Barnahjálp Sameinuðu þjóðanna, UNICEF, stóð fyrir söfnunarátakinu Degi rauða nefsins í byrjun desember. Afraksturinn var góður enda bættust um 2.000 manns í hóp heimsforeldra UNICEF sem eru nú orðnir um 16.500 talsins.
Hjá SOS barnaþorpunum á Íslandi hefur þróunin verið góð á árinu þar sem á milli 500 og 600 nýir styrktarforeldrar hafa bæst í hópinn. Heilfarfjöldi styrktarforeldra þar er nú um 5.500. Að sögn Ragnars Schram framkvæmdastjóra hefur eitthvað verið um það á móti að fólk segi upp stuðningi og vísi þá yfirleitt til þrengri fjárhagsstöðu. Þeir séu þó alls ekki eins margir og þeir sem bættust í hópinn.
Hjá ABC barnahjálp hefur þróunin hinsvegar ekki verið eins góð á árinu. ABC sker sig frá hinum hjálparsamtökunum að því leyti að þau hafa ekkert erlent bakland heldur eru alfarið íslensk að stofninum til. Um 90% allra fjármanna sem halda uppi skólum fyrir um 12.000 börn í 10 löndum Asíu og Afríku kemur allt frá Íslandi.
Að sögn Guðrúnar Margrétar Pálsdóttur formanns ABC fjölgaði styrktarforeldrum fyrst eftir hrun en í ár virðist sem tekið hafi að þrengja meira að fólki. „Það er fyrst í ár sem við finnum verulega fyrir því að hrunið hafi áhrif. Styrktarforeldum hefur fækkað mánaðarlega, sem hefur aldrei gest áður. Fólk sem reyndi fram í lengstu lög að halda þessu áfram hefur verið að gefast upp smám saman." Um persónulegan stuðning er að ræða, þar sem styrktarforeldrar fá reglulega sendar myndir af sínu barn og bréf, og því sé hjálparstarfið yfirleitt það síðasta sem fólk sparar við sig að sögn Guðrúnar.
Í mars 2009 voru 7.538 börn á framfæri íslenskra styrktarforeldra í gegnum ABC en þann 1. desember 2010 voru þau 6.722 og því fækkunin umtalsverð. Eins og áður segir eru hinsvegar 12.000 börn á framfæri ABC, auk þess sem fjölmargar beiðnir eru á biðlista, og því vantar marga stuðningsfulltrúa. „Við getum ekki sett börnin út á götu þótt stuðningurinn hætti eða vísað þeim úr skóla, þau ganga öll ennþá í skóla á okkar vegum. Við reynum að brúa bilið með því að finna aðrar leiðir, nú síðast til dæmis með súkkulaðisölu."
Til að styrkja barn í vanþróuðu landi nægir að reiða fram um 2000-3000 krónur á mánuði. Þeir sem vilja skrá sig sig sem styrktarforeldri geta gert það á heimasíðum hjálparsamtakanna.
UNICEF barnahjálp Sameinuðu þjóðanna
Börn leika sér á byggingarlóð í Indlandi. JITENDRA PRAKASH
